जळगाव (प्रतिनिधी) शहरातील नेरीनका चौकात कर्तव्य बजावत असलेल्या वाहतूक शाखेच्या महिला कर्मचारीसोबत शिवीगाळ करत अरेरावी करणार्या दुचाकीस्वाराला नागरिकांनी बेदम चोप दिल्याची घटना समोर आली आहे. महिला कर्मचाऱ्याची छेड काढणार्या दुचाकीस्वाराला पोलिसांनी ताब्यात घेतले असून शनिपेठ पोलिस ठाण्यात गुन्हा दाखल करण्यात आला आहे.
सलीमखान आरमानखान पठाण (वय-५१ रा. पाळधी मोहल्ला ता. धरणगाव) असे संशयित दुचाकीस्वाराचे नाव आहे. पोलिसांनी दिलेल्या माहितीनुसार, शहर वाहतूक शाखेच्या महिला पोलीस कर्मचारी ह्या गुरूवार १७ मार्च रोजी नेरी नाका येथे कर्तव्य बजावत होत्या. सायंकाळी ६ वाजेच्या सुमारास सलीमखान आरमानखान पठाण हा कर्तव्य बजावत असलेल्या वाहतूक शाखेच्या महिला कर्मचारीजवळ आला. त्याने तिला दुसर्या आणखी एका महिला पोलिस कर्मचार्याचा मोबाइल क्रमांक मागितला. नंबर नसल्याचे सांगितल्यावर तो कर्तव्य बजावत असलेल्या महिला कर्मचाऱ्यांवर धावून आला. त्याने कर्मचारी महिलेला शिवीगाळ करत तिचा हात पकडला. व तुझी नोकरी घालवतो असा दम दिला.
सलीमखान ला नागरिकांनी चांगलेच बदडले
यावेळी नागरिकांची एकच गर्दी झाली. नागरिकांनी गोंधळ घालत असलेल्या सलीमखान आरमानखान पठाण यास चांगलेच बदडले. घटनेची माहिती मिळाल्यावर शहर वाहतूक शाखेचे कर्मचारी तसेच शनिपेठ पोलिस स्टेशनचे कर्मचारी घटनास्थळी आले. पोलिसांनी नागरिकांच्या तावडीतून सलीमखान या सोडवुन रिक्षातून पोलीस ठाण्यात नेले. याप्रकरणी वाहतूक शाखेच्या महिला कर्मचारीने दिलेल्या फिर्यादीवरुन सलीम खान याच्याविरोधात विनयभंगासह शासकीय कामात अडथळा निर्माण केल्याप्रकरणी गुन्हा दाखल करण्यात आला आहे.
