मुंबई (वृत्तसंस्था) राष्ट्रीय तपास संस्थेचे (एनआयए) अधिकारी रविवारी मुंबई पोलिसांतील निलंबित सचिन वाझे याला घेऊन थेट मिठी नदीवर पोहोचले. काही पाणबुड्यांच्या मदतीने नदीतून दोन नंबर प्लेट, सीपीयू, हार्डडिस्क आणि डीव्हीडीसारखे पुरावे बाहेर काढले आहेत.
सचिन वाझेला घेऊन NIA ची मिठी नदीवर पाहणी करण्यासाठी आली होती. यावेळी नदीपात्रातून डिव्हीआर, दोन सीपीयू आणि वाहनाची नंबरप्लेट मिळाली आहे. त्यामुळे पुन्हा एकदा खळबळ उडाली आहे. सचिन वाझे याला NIA ची टीम मिठी नदीवर घेऊन आली होती. NIA कडून क्राईम रिक्रिएशन केलं गेलं. त्याअंतर्गत सचिन वाझेला मिठी नदीजवळ नेल्याचं समजतंय. वाझेनं काही पुरावे मिठी नदीत फेकले होते. त्या पुराव्यांचा पाण्यात उतरुन शोध घेण्यात आला. यावेळी काही इलेक्ट्रॉनिक वस्तू सापडल्याचं दिसतं आहे.
उद्योगपती मुकेश अंबानी यांच्या अँटिलिया निवासस्थानाबाहेर सापडलेल्या स्कॉर्पिअो गाडीबद्दल हिरेन यांनी दावा केला होता की, ही गाडी काही दिवसांपासून त्यांच्याकडे होती. यानंतर काही दिवसांनी त्यांचा मृतदेह ठाण्यात खाडीमध्ये सापडला होता. या प्रकरणात अँटिलियासमोर स्फोटके भरून गाडी उभी करण्यासह हिरेन यांच्या हत्येत पोलिस अधिकारी सचिन वाझे हाच मुख्य आरोपी असल्याचे मानले जाते. एनआयए आता स्फोटके आणि हिरेन हत्या अशा दोन्ही प्रकरणांचा तपास करत आहे. वाझे आणि त्याच्या साथीदारांनी या दोन्ही प्रकरणांतील पुरावे नदीत फेकले असावेत, अशी एनआयएला शंका होती. एनआयए सूत्रांनुसार, या हत्याकांडात वाझेशिवाय आणखी काही लोक सहभागी आहेत. लवकरच सर्व गुन्हेगार सापडतील. एनआयएने याप्रकरणी वाझे, सट्टेबाज नरेश आणि मुंबई पोलिसांतील माजी कॉन्स्टेबल विनायक शिंदे यांची समोरासमोर बसवून चौकशी केली आहे.
