प्रतापगड (वृत्तसंस्था) उत्तर प्रदेशमधील प्रतापगढ येथे एका कार्यक्रमादरम्यान भारतीय जनता पक्ष आणि काँग्रेसच्या कार्यकर्त्यांमध्ये तुंबळ राडा झाला आहे. दोन्ही पक्षाच्या कार्यकर्त्यांमध्ये झालेल्या हाणामारीमध्ये खासदार संगम लाल गुप्ता यांच्यासह अनेक कार्यकर्ते जखमी झाले आहेत. गुप्ता यांच्या गाडीचेही नुकसान झाले असून काँग्रेस कार्यकर्त्यांनी भाजप कार्यकर्त्यांना पळूपळू मारल्याचा आरोप करण्यात येत आहे.
घटनेचा व्हिडीओ समोर आला असून त्यात दोन्ही गट आपापसात भिडल्याचं पाहायला मिळत आहे. कार्यक्रमात सहभागी होण्यासाठी आलेल्या लोकांनी तिथून पळ काढला. काँग्रेस नेते प्रमोद तिवारी आणि त्यांच्या कार्यकर्त्यांनी आपल्यावर हल्ला केल्याचा आरोप संगम लाल गुप्ता यांनी केला. या प्रकरणी आरोपींवर कठोर कारवाई करण्याचे आदेश उपमुख्यमंत्री केशव प्रसाद मौर्य यांनी दिले आहेत.
सांगीपूरमध्ये नेमकं काय घडलं?
प्रतापगडमधील सांगीपूरमध्ये गरीब कल्याण मेळाव्याचं आयोजन करण्यात आलं होतं. कार्यक्रमाला काँग्रेस नेते आणि माजी खासदार प्रमोद तिवारी उपस्थित होते. त्याचवेळी भाजप खासदार संगम लाल गुप्ता त्यांच्या कार्यकर्त्यांसह तिथे पोहोचले. दोघांच्या कार्यकर्त्यांनी जोरदार घोषणाबाजी केली. कार्यकर्ते एकमेकांवर धावून गेले. काँग्रेस कार्यकर्त्यांनी भाजप खासदाराच्या कार्यकर्त्यांना पळवून पळवून मारल्याचा आरोप आहे. भाजप खासदाराची गाडीदेखील फोडण्यात आली. त्यामुळे परिसरात एकच खळबळ माजली.