छत्रपती संभाजीनगर (वृत्तसंस्था) जिल्ह्यातील वेरूळ येथील डमडम तलावात शेळ्या चारणाऱ्या दोन मुलांचा बुडून मृत्यू झाल्याची दुर्दैवी घटना मंगळवारी दुपारी घडली. संकेत गुलाब बमनावत (१७), आयुष त्रिंबक नागलोद (७) अशी मृत मुलांची नावे आहेत.
संकेत गुलाब बमनावत, आयुष त्रिंबक नागलोद (दोघेही रा. तलाववाडीवेरूळ) या दोघांमध्ये वयाचे अंतर असूनही ते नेहमी शेळ्या चारण्यासाठी सोबत जायचे. मंगळवारी देखील ते नेहमी प्रमाणे शेळ्या चारण्यासाठी तलाववाडी परिसरातील डमडम तलाव परिसरात गेले होते.
आयुष पोहण्यासाठी तलावाच्या कडेला गेला. परंतू पाण्याचा अंदाज न आल्याने तो बुडायला लागला. त्यामुळे संकेतनेही पाण्यात उडी घेतली. परंतू आयुषला वाचविण्याच्या प्रयत्नात तो देखील बुडाला. शेजारील शेतातील काही महिलांना तलावाशेजारी मोबाइल व चप्पल दिसल्या. परंतू बकऱ्या चारणारी दोन्ही मुले दिसत नसल्याने त्यांनी ही घटना काही ग्रामस्थांना सांगितली.
घटनेची माहिती मिळताच काही ग्रामस्थांनी डमडम तलाव परिसरात धाव घेत दोन्ही मुलांचा शोध घेण्याचा प्रयत्न केला. पण ते मिळून आले नाहीत. यानंतर घटनास्थळी दाखल झालेल्या पोलिसांनी तातडीने अग्निशमन दलाला पाचारण केले. तोपर्यंत वेरूळ येथील पट्टीचे पोहणारे तलावात उतरले होते आणि त्यांनी संकेत मनावत व आयुष नागलोद यांचा मृतदेह तब्बल तीन तासांच्या अथक परिश्रमानंतर पाण्याबाहेर काढला होता. दरम्यान, या घटनेनंतर गावात शोककळा पसरली होती. तसेच मयतांच्या नातेवाईकांचा आक्रोश मन हेलावून सोडणारा होता.
