वर्धा (वृत्तसंस्था) समृद्धी महामार्गावर आज दिवसभरात दोन गंभीर अपघात झाले आहेत. आज शनिवारी सकाळी पहिल्या दुर्घटनेत महामार्गावर पोलिसांच्या वाहनाला अपघात झाला. या अपघातात पोलीस निरीक्षक महिलेचा जागीच मृत्यू झाला. तर इतर तीन पोलिस कर्मचारी गंभीर जखमी झालेत. तर दुसऱ्या दुर्घटनेत भरधाव बीएमडब्यू कारच्या अपघातात कारमधील महिला जागीच ठार झाली. तर सुदैवाने तीन वर्षीय चिमुकली बचावली आहे. तर कारचालक मात्र, गंभीर जखमी झाला. (Samruddhi Mahamarg Accident News)
आरोपीला हरियाणा येथे घेऊन जातांना झाला अपघात !
आरोपीला हरियाणा येथे घेऊन जाणाऱ्या हरियाणा पोलिसांचे वाहन वर्ध्या नजीक समृद्धी महामार्गावर ट्रकला धडकले. यावेळी वर्धा येथील येळाकेळी टोल प्लाझा नजीक घडलेल्या या भीषण अपघातात महिला पोलीस निरीक्षक नेहा चव्हाण यांचा मृत्यू झाला आहे. तर वाहनचालक शमी कुमार, सविदर सिंग, वैदनाथ शिंदे, बिटू जागडा हे जखमी झाले आहे. मृत महिला पोलीस निरीक्षक या हरियाणाच्या पंचकुला पोलीस ठाण्यात कार्यरत होत्या. दरम्यान, चालकासह चार जण गंभीर जखमी झाले आहेत. फसवणुकीचा गुन्ह्यात आरोपी असलेल्या आरोपीला नागपूरला नेण्यात येत होते. या पोलीस वाहनाने पुढे असलेल्या ट्रकला मागून धडक दिली. त्यामुळे पोलीस वाहनाचा चेंदामेंदा झाला.
बीएमडब्यू कार डिव्हायडरला धडकली !
शनिवारी सायंकाळच्या सुमारास अपघातग्रस्त बीएमडब्यू कार मुंबईहून नागपूरकडे निघाली होती. कार महामार्गावरून भरधाव वेगात जात असताना बुलडाण्याजवळील सिंदखेडराजा टोलनाक्याजवळ चालकाचे गाडीवरील नियंत्रण सुटले आणि कार थेट डिव्हायडरला धडकली. या भीषण अपघातात कारमधील महिला जागीच ठार झाली. तर चालकालाही गंभीर दुखापत झाली. अपघातातून ३ वर्षीय चिमुकली थोडक्यात बचावली. तिच्यावर रुग्णालयात उपचार सुरू आहे. या घटनेनं हळहळ व्यक्त होत आहे.
