चाळीसगाव (प्रतिनिधी) तालुक्यातील रोहिणी गावाजवळील शिव नाल्याच्या पुलाजवळ अज्ञात वाहनाच्या धडकेत दुचाकीवरील दोघे जण जागीच ठार झाल्याची घटना घडलीय. याप्रकरणी अज्ञात चालकाविरुद्ध गुन्हा दाखल करण्यात आला आहे.
यासंदर्भात अधिक असे की, नांदगाव ते चाळीसगाव रोडावरील रोहिणी गावाजवळील शिव नाल्याच्या पुलाजवळ अज्ञात वाहन धारकाने बजाज कंपनीच्या दुचाकीला (क्र. एम.एच.०३ ए.सी. ७५०६) जोरदार धडक दिली. या अपघातात किरण भिकन मोरे (वय-२२ रा. देवारी कनाशी ता. भडगाव) व विजय अशोक मोरे (वय – २२ रा. बोदडे ता. भडगाव) हे दोघेही जागीच ठार झाल्याची घटना २३ ऑगस्ट रोजी रात्री १०:३० वाजताच्या सुमारास उघडकीस आली. घटना घडताच अज्ञात वाहन धारक हा पसार झाला. मयत किरण भिकन मोरे यांचे वडील भिकन विश्राम मोरे यांच्या फिर्यादीवरून चाळीसगाव ग्रामीण पोलीस स्थानकात अज्ञात वाहन चालकाविरुद्ध गुन्हा दाखल करण्यात आला आहे. याप्रकरणी पुढील तपास भालचंद्र पाटील हे करीत आहेत.
