जळगाव (प्रतिनिधी) गुंतवणुकीच्या नावाखाली वेगवेगळ्या घटनेत जळगाव जिल्ह्यातील दोघांना भामट्यांनी लाखोंचा चुना लावल्याची घटना उघडकीस आहे. योगेश वसंत हेबाळकर (५४, रा. आदर्श नगर, जळगाव) यांची ट्रेडिंग गुंतवणुकीच्या नावाखाली १२ लाख ६७ हजार ५०० रुपयांमध्ये फसवणूक करण्यात आली आहे. याच दिवशी जामनेर तालुक्यातील पिंपळगाव येथील व्यावसायिक विजय शेषराव भोई या व्यावसायिकाचीही सात लाखांत फसवणूक झाल्याचा प्रकार उघडकीस आला आहे. या प्रकरणी सायबर पोलिस ठाण्यात गुन्हा दाखल करण्यात आला आहे.
सायबर चोरट्यांनी पाळधी येथील एका खासगी कंपनीत मोठ्या पदावर असलेल्या योगेश हेबाळकर यांच्या व्हॉटसअॅप क्रमांकावर तीन जणांनी संपर्क साधून त्यांना ट्रेडिंग गुंतवणूक करण्यास सांगितले. त्यानुसार त्यांच्याकडून १८ डिसेंबर २०२३ ते ७ मार्च २०२४ या दरम्यान वेळोवेळी एकूण १२ लाख ६७ हजार ५०० रुपये ऑनलाईन पद्धतीने विविध बँक खात्यावर स्वीकारले. त्यानंतर मात्र त्यांना कोणताही नफा, मोबदला न देता मुद्दल रक्कमही दिली नाही. वारंवार पाठपुरावा करून आपली रक्कम परत मिळत नसल्याचे लक्षात आल्यानंतर हेबाळकर यांनी सायबर पोलिस ठाण्यात फिर्याद दिली. त्यावरून एका इन्स्टिट्युशनच्या व्हॉटसअॅप क्रमांकासह अन्य दोन अशा एकूण तीन जणांविरुद्ध गुन्हा दाखल करण्यात आला आहे.
दुसऱ्या एका अन्य घटनेमध्ये जामनेर तालुक्यातील पिंपळगाव येथील व्यावसायिक विजय शेषराव भोई (४४) यांची सात लाख रुपयांमध्ये ऑनलाईन फसवणूक करण्यात आली. भोई यांच्याशी एका जणाने २ संपर्क साधून एक लिंक पाठवली व त्याद्वारे ट्रेडिंग गुंतवणूक करण्यास सांगितली. त्यानुसार त्यांनी सुरुवातीला थोड्या रकमेची गुंतवणूक केली. त्यात त्यांना २० टक्के मोबदला देण्यात आला. त्यामुळे चांगला मोबदला मिळत असल्याने भोई यांना मोठी गुंतवणूक करण्यास सांगितले. त्यानुसार २७ मार्च ते ५ एप्रिल या दरम्यान त्यांच्या बँक खात्यातून एकूण सात लाख रुपये स्वीकारण्यात आले. मात्र त्यानंतर त्यांना कोणताही मोबदला देण्यात आला नाही. तसेच मुद्दल रक्कमही परत मिळाली नाही. त्यामुळे भोई यांनी सायबर पोलिस ठाण्यात फिर्याद दिली. त्यावरून लिंक पाठवणाऱ्याविरुद्ध गुन्हा दाखल करण्यात आला आहे.
