अमरावती (वृत्तसंस्था) विना रॉयल्टी मुरुम व गिट्टीची वाहतूक करणाऱ्या ट्रकवर कारवाई न करण्यासाठी २५ हजारांची लाच स्वीकारणाऱ्या वरूड ठाण्यात कार्यरत दोन कर्मचाऱ्यांना लाच लुचपत प्रतिबंधक विभागाच्या पथकाने रंगेहाथ अटक केली. ही कारवाई गुरुवार, २१ डिसेंबर रोजी जुना आमनेर बसस्टॉपवर करण्यात आली. पोलीस हवालदार जयश्री शरदपंत लांजेवार (३८) व पोलीस कॉन्स्टेबल आशिष श्रीकृष्णराव भुन्ते (३३) अशी अटक करण्यात आलेल्या आरोपींची नावे आहे.
या प्रकरणातील तक्रारकर्ते हे सिव्हिल इंजिनिअर असून त्यांना पोलीस हवालदार जयश्री लांजेवार व पोलीस कॉन्स्टेबल आशिष भुन्ते यांनी आपल्या बिटमधून विना रॉयल्टी मुरुम व गिट्टीची वाहतूक करणाऱ्या ट्रकवर कारवाई न करण्यासाठी प्रतिमाह २५ हजार रुपये लाचेची मागणी केली. या प्रकरणी त्यांनी लाच लुचपत प्रतिबंधक विभागाकडे तक्रार दाखल केली. तक्रारीच्या अनुषंगाने पडताळणी करण्यात आली. पडताळणीत पोलीस हवालदार जयश्री लांजेवार व त्यांचे रायटर आशिष भुन्ते यांनी लाचेची मागणी करून ती स्वीकारण्याची तयारी दर्शविल्याचे निष्पन्न झाले. त्यानुसार सापळा रचण्यात आला.
तक्रारकर्त्याकडून लाचेची २५ हजारांची रक्कम स्वीकारताच जयश्री लांजेवार व आशिष भुन्ते यांना लाच लुचपत प्रतिबंधक विभागाच्या पथकाने रंगेहाथ अटक केली. त्यांच्याविरुद्ध वरूड ठाण्यात गुन्हा दाखल करण्यात आला. ही कारवाई पोलीस निरीक्षक शिल्पा भरडे व प्रवीण बोरकुटे, विनोद धुळे, शैलेश कडू, चित्रलेखा वानखडे, स्वप्निल क्षीरसागर यांनी केली.
