रावेर (प्रतिनिधी) काँग्रेसच्या जनसंवाद यात्रेनिमित्त एनएसयूआयच्या कार्यकर्त्यांनी काढलेल्या दुचाकी रॅलीत झालेल्या अपघातात एक तरुण कार्यकर्त्याचा मृत्यू झाला आहे. भुवनेश डालुराम तेजारा (वय २० रा. भोकरी,ता. रावेर), असे मयत विद्यार्थ्याचे नाव आहे.
भुवनेश तेजारा हा फैजपूर येथील डी. एन. कॉलेजमध्ये बीसीएच्या दुसऱ्या वर्षांचा विद्यार्थी आहे. मंगळवारी काँग्रेसचे विधिमंडळ गटनेते बाळासाहेब थोरात जनसंवाद यात्रेनिमित्त रावेर तालुक्यात होते. त्यांच्या स्वागतासाठी युवक कॉंग्रेसने दुचाकी रॅली काढली होती. यावेळी दुपारी १.३० ते १.४५ वाजेदरम्यान कोचूर ते सावदा दरम्यान झालेल्या अपघातामध्ये भुवनेश हा रस्त्यावर पडला. रस्ता सिमेंट काँक्रिटचा असल्याने त्याच्या डोक्याला जबर मार लागला.
अपघात झाल्याचे दिसताच माजी मंत्री बाळासाहेब थोरात, रावेरचे आमदार शिरीष चौधरी यांच्यासह पदाधिकाऱ्यांनी तत्काळ ताफा थांबवत जखमी कार्यकर्त्यांला वाहनातून दवाखान्यात रवाना केले. मात्र, डॉ. उल्हास पाटील वैद्यकीय महाविद्यालय व रुग्णालयात नेल्यावर डॉक्टरांनी त्याला मृत घोषित केले.
