पिंपरी (वृत्तसंस्था) घरातील एका ओल्या अंडरवेअरवरुन चक्क खुनाचा उलगडा झाला आहे. पुणे जिल्ह्यातील हिंजवडीतील साखरे वस्ती येथे भागात ३८ वर्षीय तरुणाची हत्या करण्यात आली होती. हिंजवडी पोलिसांनी हत्येचा तपास करत एका तरुणाला अटक केली आहे. कैलास अंकुश डोंगरे (वय २३) असे अटक केलेल्या तरुणाचे नाव आहे.
पोलिसांनी दिलेल्या माहितीनुसार, संतोष विश्वनाथ माने (वय ३८, रा. साखरेवस्ती, हिंजवडी), असे खून झालेल्या व्यक्तीचे नाव आहे. संतोष मानेचा अज्ञात व्यक्तीने धारदार हत्याराने वार करून खून केला. याबाबत हिंजवडी पोलीस ठाण्यात गुन्हा दाखल झाला. त्यानंतर पोलिसांनी परिसरात नवीन कोणी आले आहे का, अशा बाबींचा तपास सुरू केला. शेजारी राहणाऱ्या लोकांनी देखील त्यांना याबाबत काहीही माहिती नसल्याचे सांगितले. खुनातील आरोपीचा काहीच सुगावा लागत नव्हता.
दरम्यान, पोलिसांनी शेजारील घरात पाहणी केली. त्यावेळी सहायक पोलीस उपनिरीक्षक बंडू मारणे यांच्या नजरेमध्ये शेजारच्या घरात ओली चड्डी (अंडवेअर) दिसली. घरातील सर्व कपडे सुकलेले आहेत. पंरतु फक्त एक चड्डी ओली का, असा प्रश्न मारणे यांनी केला. मी अंघोळ केली आहे, असे कैलास डोंगरे याने सांगितले. एवढया रात्री त्याने आंघोळ का केली, असा प्रश्न मारणे यांच्या मनात उपस्थित झाला. मी चड्डीत ओकल्यामुळे आंघोळ केली, असे कैलासने सांगितले. त्यामुळे संशय बळावला. चड्डीत कसे ओकू शकतो, असा प्रश्न उपस्थित झाला.
त्यामुळे पोलिसांनी कसून चौकशी केली असता कैलासने हा गुन्हा केल्याचे कबूल केले. मयत संतोष व त्याची पत्नी हे दोघेजण आरोपी कैलास याच्या आई-वडिलांसोबत सतत भांडण करत होते. त्या कारणावरून संतोषचा खून केला असल्याची कबुली कैलासने दिली.
