बारामती (वृत्तसंस्था) शेतात काम करीत असतांना वीज खांबाच्या ताण दिलेल्या तारेला स्पर्श झाल्याने शेतकऱ्याचा जागीच मृत्यू झाल्याची घटना बुधवारी (दि. ०४ ) सायंकाळी साडेपाचच्या सुमारास बारामती तालुक्यातील सुपे नजीक असणाऱ्या उत्तर खोपवाडीत घडली. शहाजी रामचंद्र चांदगुडे (वय ४०) असे या मृत्यू झालेल्या शेतकऱ्याचे नाव आहे.
शहाजी चांदगुडे हे शेतात सारे काढीत असताना वीज खांबाच्या ताण दिलेल्या तारेला स्पर्श झाल्यामुळे त्यांचा जागीच मृत्यू झाला. या घटनेला वीज वितरण कंपनी जबाबदार असल्याने शेतकरी संतप्त झाले होते. त्यामुळे या शेतकऱ्याला मदत मिळाल्या शिवाय येथील मृतदेह हलवू देणार नाही, अशी भूमिका शेतकऱ्यांनी घेतली होती. साधारण चार तासांनी पोलीस आणि महावितरणचे अधिकारी घटनास्थळी पोहोचले आणि त्यांनी मयत शेतकऱ्याच्या कुटुंबाला सर्वोतोपरी मदत मिळवून देण्याचे आश्वासन दिले.
