पुणे (वृत्तसंस्था) पुण्यातल्या लोणी काळभोर भागात शौचालयाच्या टाकीचं काम करत असताना त्यात पडून चार जणांचा मृत्यू झाला आहे. एका खासगी निवासस्थानाच्या टाकीत हे चार जण पडले होते. तिथे गुदमरून त्यांचा मृत्यू झाला आहे.
अग्निशमन दलाच्या गाड्या तात्काळ घटनास्थळी दाखल झाल्या आहेत. या घटनेने परिसरात खळबळ माजली आहे. सिकंदर पोपट कसबे, पद्माकर मारुती वाघमारे, कृष्णा दत्ता जाधव आणि रुपेश कांबळे असे मृत्यू झालेल्या व्यक्तींची नावे आहेत. पोलिसांनी दिलेल्या माहितीनुसार, लोणी काळभोर येथील प्यासा हॉटेल मागे जय मल्हार कृपा इमारत असून शौचालयाच्या टाकीचं काम सुरू होते. त्यावेळी टाकीचे उपासा करण्याचे काम सिकंदर पोपट कसबे,पद्माकर मारुती वाघमारे,कृष्णा दत्ता जाधव आणि रुपेश कांबळे हे चौघे जण करीत होते.
त्या चौघांपैकी एक जण खाली पडला. त्याला बाहेर काढत असताना, तिघे जण आतमध्ये पडले. या घटनेची माहिती मिळताच, चौघांना जवळील खासगी रुग्णालयात दाखल केले असता, त्या चौघांचा गुदमरून मृत्यू झाल्याचे डॉक्टरांनी सांगितले, अशी माहिती लोणी काळभोर पोलिसांनी दिली.
