पाली (वृत्तसंस्था) पंतप्रधान नरेंद्र मोदी यांनी सोमवारी जैनाचार्य विजय वल्लभ सुरिश्वरजी महाराज यांच्या १५१ व्या जयंतीनिमित्त त्यांच्या सन्मानासाठी ‘स्टॅच्यू ऑफ पीस’चे अनावरण केले. अष्टधातूपासून तयार करण्यात आलेल्या १५१ फूट उंचीची हा पुतळा राजस्थानच्या पाली जिल्ह्यातील जेतपुरा येथे विजय वल्लभ साधना केंद्रात उभारण्यात आला आहे.
व्हिडिओ कॉन्फरन्सिंगद्वारे मोदींनी या पुतळ्याचे अनावरण केले. गुजरातमधील केवडिया येथे सरदार वल्लभभाई पटेल यांचा जगातील सर्वात उंच स्टॅच्यू ऑफ यूनिटीचे लोकार्पण करण्याची संधी मला मिळाली आणि आज जैनाचार्य विजय वल्लभ यांच्या ‘स्टॅच्यू ऑफ पीस’ या पुतळ्याचे अनावरण करण्याचे सौभाग्य मला लाभले असे मोदी म्हणाले. भारताने नेहमीच संपूर्ण विश्व आणि मानवतेसाठी शांती, अहिंसा आणि बंधुत्वाचा मार्ग दाखवला आणि हा तोच संदेश आहे ज्याची प्रेरणा संपूर्ण विश्वाला भारताकडून मिळाली असे मोदी म्हणाले. याच मार्गदर्शनासाठी जग आज पुन्हा एकदा भारताकडे पाहत आहे. जेव्हा केव्हा आंतरिक प्रकाशाची आवश्यकता होती, तेव्हा तेव्हा संत परंपरेमधून कोणत्या कोणत्या सूर्याचा उदय झाला आहे. कोणी मोठा संत प्रत्येक कालखंडात आमच्या देशात झाला. अशा संतांनी त्या-त्या कालखंडात समाजाला दिशा दिली. आचार् वल्लभजी असेच एक संत होते, असे मोदी आपल्या संबोधनात म्हणाले. सन १८७० मध्ये विजय वल्लभ यांचा जन्म झाला. त्यांनी भगवान महावीर यांचा संदेश प्रचारित करण्यासाठी नि:स्वार्थ भावाने जैन संताच्या रुपात आपले जीवन व्यथित केले. त्यांनी सर्वसामान्य लोकांच्या कल्याणासाठी, शिक्षणाच्या प्रचारासाठी, चुकीच्या सामाजिक प्रथांच्या उन्मूलनासाठी सतत काम केले, असेही मोदी पुढे म्हणाले. त्यांनी कविता, निबंध आणि भक्ती रचनांसारख्या प्रेरक साहित्याची रचनाही केली. त्यांनी स्वातंत्र्य चळवळीतही आपले योगदान दिले आणि स्वदेशीचा प्रचार केला. विजय वल्लभ सुरिश्वरजी महाराज यांच्या प्रेरणेने अनेक राज्यांमध्ये शाळा, कॉलेज आणि अध्ययन केंद्रांसह ५० हून अधिक शैक्षणिक संस्था काम करत आहेत. त्यांच्या सन्मानार्थ स्थापन करण्यात येणाऱ्या या पुतळ्याला शांती पुतळा असे नाव देण्यात आले आहे.
