जळगाव (प्रतिनिधी) जळगाव जिल्हा उपनिबंधक कार्यालयातील सहकार विभागाच्या बैठकीसाठी दुचाकीवर येणारे बोदवड तालुक्यातील विका सोसायटीच्या सचिवाला ट्रकने चिरडल्याची घटना आज २२ ऑगस्ट रोजी सकाळी आकाशवाणी चौकात घडली. पंजाबराव नामदेन बोरसे (५२, रा. बोदवड), असे मयताचे नाव आहे.
आज जिल्हा उपनिबंधक कार्यालयातील सहकार विभागाची मंगळवारी बैठक आयोजित करण्यात आली होती. या बैठकीसाठी कोल्हाडी, ता. बोदवड विका सोसायटीचे सचिव पंजाबराव बोरसे हे सकाळी बोदवड येथून दुचाकीने (क्र. एमएच १९, एसी २२४) जळगावला यायला निघाले. ते शहरातील आकाशवाणी चौकात पोहचल्यानंतर मागून येणाऱ्या गॅस सिलिंडर घेऊन जाणाऱ्या ट्रकने (क्र. एमएच ०४, जेयु ९५९६) त्यांना धडक दिली. यात बोरसे चाकाखाली आले व त्यांच्या डोक्याचा चेंदामेंदा झाला. त्यामुळे ते जागीच गतप्राण झाले. मोठा आवाज झाल्याने नागरिकांनी तेथे धाव घेतली व पोलिसही तेथे पोहचले. त्यांनी रुग्णावाहिका मागवून मृतदेह शासकीय वैद्यकीय महाविद्यालय व रुग्णालयात हलविला.
