वरणगाव (प्रतिनिधी) वरणगाव परिसरातील पिंपळगाव बुद्रुक व ओझरखेडा येथे एकाच रात्री चोरटयांनी घरफोड्या केल्याची घटना समोर आली आहे. पिंपळगाव बु येथील दोन ठिकाणी चोरटयांनी घरफोडी केली. त्यात रोकडसह सोन्याचे दागिने चोरट्यांनी लांबविले. तर ओझरखेडा येथील एका घरातून चोरटयांनी ४ लाख ७५ हजाराचा मुद्देमाल लंपास केला. या प्रकरणामुळे गावकऱ्यांमध्ये सर्वत्र भीतीचे वातावरण पसरले आहे.
पिंपळगाव बु येथील शिवमंदिर परिसरातील एका घरातून रोकडसह सोन्याचे दागिने चोरी
यासंदर्भात किशन शेनफडू बेंडाळे (वय ४९, रा. शिवमंदिर पिंपळगाव बु ता. भुसावळ ह.मु. शिवब्राईटाऊन टाऊनशिप फ्लॅट नं. रुबी २०२, खापरी पुनर्वसन, नागपूर) यांनी दिलेल्या फिर्यादीनुसार, दि. ६ जून २०२२ रोजी कोणीतरी अज्ञात चोरट्याने किसन शेनफडू व त्यांच्या गावातील अनंता सिताराम सरोदे, अशोक मधुकर सरोदे यांचे ४० हजार रुपये रोख रक्कम, २५ हजार रुपये किंमतीचे दीड तोळे वजनाचे एक सोन्याची पोत, असा एकूण ६५ हजार रुपयांचा मुद्देमाल अज्ञात चोरट्याने बंद दरवाजाचे कुलूप तोडून आत प्रवेश करून चोरला आहे. या प्रकरणी वरणगाव पोलीस स्थानकात अज्ञात चोरट्याविरुद्ध गुन्हा दाखल करण्यात आला असून पुढील तपास पोहेकॉ मनोहर पाटील हे करीत आहेत.
पिंपळगाव बु येथील एका घरातून रोकडसह सोन्याचे दागिने चोरी
यासंदर्भात राहुल आत्माराम पाटील (वय ३२, रा. पिंपळगाव बु ता.भुसावळ) यांनी दिलेल्या फिर्यादीनुसार, दि. ६ जून २०२२ रोजी भुसावळ तालुक्यातील पिंपळगाव बु गावातील राहुल पाटील यांच्या घरातून ३२ हजार रुपये किंमतीची सोन्याची पोत व रोख रक्कम, ३५ हजार रुपये किंमतीची १० ग्रॅम वजनाची सोन्याची पोत व रोख रक्कम, असा एकूण ६७ हजार रुपयांचा मुद्देमाल कोणीतरी अज्ञात चोरट्याने राहुल पाटील व साक्षीदार यांचे बंद घराचे कुलूप तोडून दरवाजा उघडून आत प्रवेश करून चोरून नेला आहे. या प्रकरणी वरणगाव पोलीस स्थानकात अज्ञात चोरट्याविरुद्ध गुन्हा दाखल करण्यात आला असून पुढील तपास पोहेकॉ मनोहर राजाराम पाटील हे करीत आहेत.
ओझरखेडा गावातील एका घरातून ४ लाख ७५ हजाराचा मुद्देमाल लंपास
यासंदर्भात नशिकेत चावदस बेंडाळे (वय ७३ रा. ओझरखेडा ता. भुसावळ) यांनी दिलेल्या फिर्यादीनुसार, दि. ७ जून २०२२ रोजी कोणीतरी अज्ञात चोरट्यांनी नशिकेत बेंडाळे यांच्या बंद घराचे कुलूप तोडून आत प्रवेश करून राहते घरातील कपाटात ठेवलेले १ लाख रुपये किंमतीचे ५० ग्रॅम वजनाच्या सोन्याच्या बांगड्या, २० हजार रुपये किंमतीची १० ग्रॅम वजनाची सोन्याची चैन, १ लाख रुपये किंमतीची ५० ग्रॅम वजनाचे सोन्याचे दागिने, २ लाख ५५ हजार रोख रक्कम, असा एकूण ४ लाख ७५ हजार रुपयांचा मुद्देमाल चोरला आहे. याप्रकरणी वरणगाव पोलीस स्थानकात अज्ञात चोरट्याविरुद्ध गुन्हा दाखल करण्यात आला असून पुढील तपास सपोनि अशीष आडसूळ हे करीत आहेत.
