चाळीसगाव (प्रतिनिधी) सामाजिक क्षेत्रात उल्लेखनीय सेवा कार्य केल्याबद्दल अंधश्रद्धा निर्मूलन व वैज्ञानिक दृष्टिकोन समितीच्या वतीने चाळीसगाव येथील सामाजिक कार्यकर्ते वर्धमान धाडीवाल यांना पुरस्कार देऊन सन्मानित करण्यात आले.
संपूर्ण कोरोना काळात मित्र परिवारातर्फे चाळीसगाव शहरातील रुग्णालयातील रुग्ण व त्यांच्या नातेवाईकांना केलेली भोजन व्यवस्था दिव्यांग बंधू आणि भगिनी यांना त्यांना उपयुक्त असलेल्या साहित्याची मदत म्हणून वाटप त्याचप्रमाणे आपली पत्नी जयश्री धाडीवाल यांच्या वाढदिवसाचे औचित्य साधून परितक्त्या व विधवा महिलांना शिलाई मशीन व गरजू साहित्याची मदत देऊन रोजगार उपलब्ध होण्यासाठी केलेली मदत त्याचप्रमाणे सामाजिक शैक्षणिक क्षेत्रामध्ये सतत आपल्या सहकाऱ्यांच्या मदतीने केलेल्या उल्लेखनीय कामगिरीसाठी त्यांना सामाजिक क्षेत्रातील राज्यस्तरीय राजमाता जिजाऊ पुरस्कार देऊन या संस्थेने आज मालेगाव येथील सटाणा रोडवरील रेणुका लॉन्स मध्ये आयोजित कार्यक्रमात सन्माननीत केले. प्रसिद्ध शिवशाहीर विजय तनपुरे, मालेगाव येथील अप्पर पोलीस अधीक्षक चंद्रकांत खांडवी, उपविभागीय पोलिस अधिकारी लता दोंदे, मालेगावच्या माजी उपमहापौर भोसले, संस्थेचे अध्यक्ष तानाजी शिंदे आदी मान्यवरांच्या हस्ते हा पुरस्कार प्रदान करण्यात आला. यावेळी महाराष्ट्रातील अनेक मान्यवर उपस्थित होते.
