नवी दिल्ली (वृत्तसंस्था) व्हॉट्स ऍप, इन्स्टाग्राम, फेसबुक आणि फेसबुक मेसेंजरमध्ये तांत्रिक अडचणी आल्या आहेत. त्यामुळे व्हॉट्स अॅप, इन्स्टाग्राम, फेसबुक आणि फेसबुक मेसेंजरची सेवा ठप्प झाली आहे. व्हॉट्सअॅप सर्व्हर ठप्प होण्यामागे नेमके कारण काय आहे, हे अद्याप समजू शकलेले नाही.
जगात लोकप्रिय असणारे मेसेंजिग अॅप व्हॉट्सअॅपचे सर्व्हर अचानकपणे बंद पडले आहे. सर्व्हर बंद पडल्यामुळे सगळ्या सुविधा बंद झाल्या आहेत. मेसेजिंग, व्हिडीओ कॉल, ग्रूप चॅट, ही सर्व फिचर्स सध्या बंद पडली आहेत. हा प्रकार साधारणपणे मागील एक तासभरापासून जाणवत आहे. व्हॉट्सअॅप अचानकपणे बंद पडल्यामुळे ट्विटरवर व्हॉट्सअॅप डाऊनचा ट्रेण्ड सुरु झाला आहे. माहिती तंत्रज्ञान क्षेत्रात तज्ज्ञ असणाऱ्या व्यक्तींनासुद्धा यामागचं नेमकं कारण अजून समजू शकलेलं नाही.
व्हाट्सअॅपला नवे मेसेज सेंड आणि रिसिव्ह होत नाहीयेत. त्याचबरोबर व्हाट्सअॅप स्टेटसही अपलोड होण्यास अडचण येत आहे. तर दुसरीकडे फेसबुक तसेच फेसुकच्या मालकीचे असलेले मेसेजिंग अॅप मेसेंजरसुद्धा डाऊन झाले आहे. कोणतेही संदेश जात किंवा येत नाहीयेत. संदेश वहनास अडचणी येत असल्यामुळे नेटकऱ्यांना मोठ्या अडचणींचा सामना करावा लागतोय. नेमक्या कुठल्या कारणाने हा तांत्रिक बिघाड झाला आहे, किती यूजर्सना याचा फटका बसला आहे, याविषयी अद्याप माहिती समोर आलेली नाही.
