नागपूर (वृत्तसंस्था) किन्ही धानोली येथून भरधाव पाण्याच्या टँकरने दुचाकीस्वाराला चिरडले. या अपघातात दाभा येथील युवकाचा जागीच मृत्यू झालाय. तर सुदैवाने दुचाकीवरील महिला सुखरूप बचावली. मृतकाचे नाव युवराज ज्ञानेश्वर वलके (३३, रा. दाभा), असे आहे.
सोमवारी हिंगणा आठवडी बाजार असतो. बाजारासाठी युवराज आपल्या दुचाकीने हिंगणा येथे आला होता. बाजार आटोपल्यानंतर दाभा येथे परतताना गावातील शेजारी महिला सारिका इवनाते यांना सोबत घेतले. परतताना किन्ही- धानोली येथून भरधाव टँकरने दुचाकीस्वाराला उडविले. या अपघातात युवराजच्या छातीवरून टँकरचे मागील चाक गेले. यामुळे त्याचा जागीच मृत्यू झाला.
या घटनेनंतर टँकरसह चालक पसार होण्यात यशस्वी झाला. मात्र सारिका इवनाते या महिलेला काहीही झाले नाही. घटनेची माहिती मिळताच धनगरपुरा येथील युवकांनी मदतीसाठी धाव घेतली. हिंगणा पोलीस उपनिरीक्षक स्वप्निल राऊतसह ताफा घटनास्थळी दाखल झाला. पोलिसांनी पंचनामा करून मृतदेह शवविच्छेदनासाठी स्थानिक ग्रामीण रुग्णालयात हलविण्यात आला. पोलिसांनी टँकरचालकाचा शोध घेतल्याची माहिती आहे. या घटनेमुळे दाभा गावात शोककळा पसरली आहे.
