जळगाव (प्रतिनिधी) धरणगाव तालुक्यातील हनुमंतखेडे येथे चारित्र्याच्या संशयातून पतीने पत्नीचा निर्घृण खून केल्याची घटना समोर आली आहे.
हनुमंतखेडे येथील सोमनाथ सोनवणे याने पत्नी शितल उर्फ आरती सोनवणे झोपेत असतानाच तिच्या डोक्यात मध्यरात्री साडेतीनच्या सुमारास कुऱ्हाडीने वार केले. या हल्ल्यात दहा वर्षांचा मुलगा सिद्धू थोडक्यात बचावला, मात्र त्याच्या हाताला गंभीर दुखापत झाली. शितलला तातडीने जळगावच्या खाजगी रुग्णालयात दाखल करण्यात आले, मात्र उपचारादरम्यान तिचा मृत्यू झाला. याप्रकरणी शितल हिच्या भावाच्या फिर्यादीवरून सोमनाथ सोनवणे याच्यावर खुनाचा गुन्हा दाखल करण्यात आला असून पोलिसांनी त्याला अटक केली आहे. दरम्यान या घटनेमुळे धरणगाव तालुक्यात खळबळत उडाली आहे.
