हैदराबाद (वृत्तसंस्था) हैदराबादमध्ये एका अवघ्या सहा वर्षांच्या चिमुरडीवर बलात्कार करून तिची हत्या करण्यात आल्याचं प्रकरण समोर आलं होतं. या प्रकरणावरून तेलंगना सरकारमधील कामगार मंत्री मल्ला रेड्डी यांनी खळबळजनक विधान केलंय. ‘आरोपींना लवकरात लवकर शोधून काढून त्याचा एन्काऊन्टर करणार’, असं वक्तव्य त्यांनी केलं आहे.
तेलंगना सरकारमध्ये कामगार मंत्री पदाची जबाबदारी सांभाळणारे मल्ला रेड्डी यांनी या घटनेची तीव्र निंदा केली. हैदराबादच्या चिमुरडीवर बलात्कार करणाऱ्या आरोपीला कठोरातील कठोर शिक्षा मिळालयला हवी. आम्ही त्याला अटक करू आणि एन्काऊन्टर करू, आम्ही आरोपीला सोडणार नाही, असं म्हणताना मंत्रीपदावर असणाऱ्या रेड्डी यांचा तोल ढळलेला दिसून आला. लवकरच आपण पीडित कुटुंबीयांची भेट घेऊन त्यांना हरएक प्रकारे मदत करण्याचा प्रयत्न करू, असं आश्वासनही रेड्डी यांनी दिलं.
सहा वर्षांच्या मुलीवर बलात्कारानंतर हत्या
९ सप्टेंबर रोजी हैदराबाद मध्ये अवघ्या सहा वर्षांच्या मुलीवर बलात्कारानंतर हत्या करण्यात आली होती. मुलीचा मृतदेह एका बंद घरात आढळून आल्यानंतर या भागात खळबळ उडाली. शेजारीच राहणाऱ्या एका ३० वर्षीय इसमाचा पोलीस या प्रकरणात शोध घेत आहेत. यासाठी पोलिसांनी वेगवेगळ्या १५ टीम्स तयार केल्या आहेत. मध्य प्रदेश आणि आंध्र प्रदेशातही आरोपीचा शोध सुरू आहे. हैदराबाद पोलिसांकडून आरोपीला पकडून देणाऱ्यास १० लाख रुपयांचं बक्षीस घोषित करण्यात आलंय.
