धरणगाव (प्रतिनिधी) शहरातील मध्यवर्ती भागातील झुमकराम सार्वजनिक वाचनालयाच्या जागेतील दोन गट संत सावता माळी शिक्षण संस्थेसाठी आरक्षित होते. अगदी जिल्हाधिकाऱ्यांच्या परवानगीने संबंधित जागा भाडेतत्वावर जागा देण्याचा ठरावही पालिकेत मंजूर झाला होता. त्यामुळे पालिका प्रशासनाने व्यापारी संकुलातील एक संपूर्ण मजला शाळेसाठी राखीव करावा. अन्यथा शाळेला पर्यायी जागा द्यावी, अशी मागणी संस्थेची आहे. परंतु ही मागणी फेटाळून लावत पालिका प्रशासनाने बांधकामाला सरळ स्टे मिळू नये म्हणून आधीच न्यायालयात कॅव्हेट करून ठेवली. तसेच जलदगतीने काम करून बांधकाम आता पूर्णत्वाच्या मार्गावरही पोहचवले आहे. त्यामुळे आता शिक्षण संस्थेला न्याय मिळेल की, पुन्हा एक जागा गिळंकृत करण्यात काही जण यशस्वी होतील?, याकडेच सुज्ञ नागरिकांचे लक्ष लागून आहे. तर दुसरीकडे पालिकेतील विरोधी पक्ष शांत बसून असल्यामुळे देखील आश्चर्य व्यक्त केले जात आहे.
शहरातील मध्यवर्ती भागात सुरु असलेले झुमकराम सार्वजनिक वाचनालय आणि व्यापारी संकुलनातील दोन गट संत सावता माळी शिक्षण संस्थेसाठी आरक्षित होते. परंतू २००५ डीपी रीवाईज झाल्यानंतर हे आरक्षण संपुष्टात आल्याचे पालिका प्रशासनाचे म्हणणे आहे. तर दुसरीकडे झुमकराम सार्वजनिक वाचनालय आणि व्यापारी संकुलनाचे बांधकाम सुरु असलेल्या दोन गटांवर संत सावता माळी शिक्षण संस्थेसाठी आरक्षण होते. त्यामुळे सन २०१२-१३ मध्ये जिल्हाधिकाऱ्यांची परवानगी घेऊन शिक्षण संस्थेला जागा भाडेतत्वावर देण्याबाबत ठराव तत्कालीन नगराध्यक्ष ज्ञानेश्वर महाजन यांनी केला होता.
दुसरीकडे अॅड.शरद माळी यांनी झुमकराम वाचनालयाच्या बांधकामासंदर्भात माहिती अधिकारात माहिती मागितली होती. त्यात प्रामुख्याने पालिकेच्या ठरावाची प्रत. तसेच जागेचा सिटीसीएस उतारा, संपूर्ण आलेल्या निविदा सहित इस्टीमेटच्या प्रति, नगररचना विभागाची मंजुरी प्रत, आरसीसी ड्रॉईंग प्रत तसेच ज्या व्यक्तीला निविदा दिली आहे, त्या व्यक्तीचे संपूर्ण कायदेशीर जीएसटी आणि आयकर परताव्याची माहिती. त्याच बरोबर वेळोवेळी मटेरियल टेस्टिंग होत असल्याचा अहवाल, भूकंप प्रतिरोधक ड्रॉईंग, वाचनालय आणि शॉपिंग कॉप्लेक्स एकत्र बांधण्याचा संबंध काय? बाबत माहिती. गावाच्या लोकसंख्येनुसार क नगरपालिकेच्या वाचनालयाचे क्षेत्रफळ आवश्यकतेनुसार कमी अथवा जास्त असल्याबाबतची माहिती, सदरची जागा वाचनालयासाठी आरक्षित असल्याची माहिती, ठेकेदारास दिलेले आदेश याची माहिती अॅड.माळी यांनी माहिती अधिकारात मागवली होती. परंतू यातील फक्त काही मुद्द्यांची माहिती देण्यात आली तर इतर मुद्द्यांची माहिती देण्यात आलेली नाही. त्यामुळे पालिका प्रशासन मुद्दाम काही माहिती लपवू इच्छित आहे का? असा प्रश्न उपस्थित केला जात आहे.
दरम्यान, भेदरलेल्या पालिका प्रशानासाने झुमकराम वाचनालय व व्यापारी संकुल बांधकामासंदर्भात न्यायालयात कॅव्हेट दाखल करून ठेवली आहे. त्यामुळे बांधकामावर स्टे देण्यापूर्वी आता न्यायालयाला पालिका प्रशासनाची बाजू ऐकून घ्यावी लागणार आहे. परंतू पालिकेतील विरोधी पक्षच शांत बसून असल्यामुळे सुज्ञ नागरिक आश्चर्य व्यक्त करत आहेत. एका भरभराटीस येणाऱ्या शिक्षण संस्थेला न्याय देण्यासाठी कुणीही पुढे का येत नाहीय?, असा सवाल देखील विचारला जात आहे. तर शिक्षण संस्थेसाठी राखीव जागेवर व्यापारी संकुल उभारणीचा डाव गंभीर असून तालुक्यातील शैक्षणिक चळवळ धोक्यात आणण्याचा प्रयत्न असल्याची प्रतिक्रिया शिक्षणतज्ञ व्यक्त करत आहेत.
