धरणगाव (प्रतिनिधी) धावडा ता. अमळनेर येथील तापी नदीवरून साकरे ता. धरणगाव येथे तब्बल १४ किमीच्या अंतरावरून पाईपलाईन करून पाणीपुरवठा योजना मंजूर करण्यात आली असून आज सदर योजनेचे भूमिपूजन पाणीपुरवठा व स्वच्छता मंत्री तथा जिल्ह्याचे पालकमंत्री ना. गुलाबराव पाटील यांचे हस्ते विधिवत पूजा करून करण्यात आले. कोविडच्या सर्व नियमांचे पालन करून हा कार्यक्रम पार पडला.
याबाबत वृत्त असे की, राष्ट्रीय पेयजल योजनेअंतर्गत पालकमंत्री ना. गुलाबराव पाटील यांनी साकरे गावासाठी १ कोटी ३५ लाख एवढ्या निधीतून पाणीपुरवठा योजना मंजूर केल्याने आता साकारे गावाची तहान भागणार आहे. सदर योजनेत धावडा येथे तापी नदीकाठी विहीर, विहीर धावडा येथे विहीर, १४ किलोमीटरची पाईपलाईन, पिंग मशीन, पंप हाऊस इत्यादी बाबींचा समावेश आहे. सध्या धरणगाव तालुक्यातील उखडवाडी व साकरे या दोन गावांमध्ये राष्ट्रीय पेयजल योजनेतून पाणीपुरवठा योजना सुरू करण्यात आलेल्या असून तालुक्यातील ३८ गावांमध्ये जलजीवन मिशन मधून पाणीपुरवठा योजना मंजूर करण्यात आल्या आहेत. त्यामुळे धरणगाव तालुका हा कायमस्वरूपी पूर्णपणे टँकर मुक्त होण्यास मदत होणार आहे.
यावेळी पालकमंत्री ना. गुलाबराव पाटील यांनी सांगितले की, साकरे येथील ग्रामस्थांना सदर पाणी पुरवठा योजना वरदान सिद्ध होणार आहे. येथे गावंतर्गत पेव्हींग ब्लॉक बसविणे, स्मशानभूमीत शेड बांधकाम, गावाजवळ प्रवेशद्वार बांधकाम तसेच साकरे ते सोनखडी आणि साकरे ते रोटवद असे दोन्ही रस्त्यांचे डांबरीकरण इ.कामे मंजूर केलेले असून १००% गाव पेव्हिंग ब्लॉक बसविणार असल्याचे पालकमंत्री ना. गुलाबराव पाटील यांनी सांगितले. बघा नाल्याच्या खोलीकरणासह एक लाख लिटर क्षमतेची पाण्याच्या टाकीचे बांधकाम व साकरे ते जुना धरणगाव रस्त्याचे काम लवकरच मंजूर करणार असल्याची माहिती देखील त्यांनी दिली.
दरम्यान, यावेळी साकरे गावात पाणीपुरवठा योजनेसह विविध विकास कामे मंजूर केल्याबद्दल पालकमंत्री ना. गुलाबराव पाटील यांचा ग्रामपंचायत व ग्रामस्थांतर्फे सत्कार करण्यात येऊन ग्रामस्थांनी समाधान व्यक्त केले.
याप्रसंगी सरपंच शरद पाटील, उपसरपंच रंगराव पाटील, सुधाकर पाटील, शरद गुजर, भाऊसाहेब पाटील, शिवाजी पाटील, शितल पाटील, मोतीलाल पारधी, प्रवीण बाविस्कर, पोलीस पाटील घनश्याम पाटील, माजी सभापती दीपक सोनवणे, प्रमोद पाटील, मोतीआप्पा पाटील यांच्यासह परिसरातील प्रमुख पदाधिकारी व लोकप्रतिनिधी उपस्थित होते. कार्यक्रमाचे प्रास्ताविक व सूत्रसंचालन पोलीस पाटील घनश्याम पाटील यांनी केले तर आभार सरपंच शरद पाटील यांनी मानले.
