जळगाव प्रतिनिधी : दारुच्या नशेत रेल्वे रुळावर बसलेल्या तरुणांना शिवीगाळ केल्याचा रागातून अमर वसंत सपकाळे (वय ४२, रा. खंडेराव नगर) या तरुणाचा दोघांनी दगडाने ठेचून निघृण खून केला. ही घटना रविवारी सकाळी सात वाजेच्या सुमारास उघडकीस आली. मृतदेह खंडेराव नगराजवळील रेल्वे रुळांमध्ये पडलेला मिळून आल्याने सुरुवातीला रेल्वेची धडक लागून मृत्यू झाल्याचा अंदाज वर्तवीला जात होता. परंतू मृतदेहाजवळ रक्ताने माखलेला दगड मिळून आल्याने पोलिसांनी खून झाल्याचे निष्पन्न केले. पोलिसांनी १२ वीचे पेपर देणाऱ्या अल्पवयीन मुलासह एकाला चौकशीसाठी ताब्यात घेतले असून याप्रकरणी रात्री उशिरापर्यंत गुन्हा दाखल करण्यात आला आहे.
शहरातील खंडेराव नगरात अमर सपकाळे हा तरुण कुटुंबियांसह वास्तव्यास होता. हातमजूरी करुन तो कुटुंबाचा उदनिर्वाह करीत होता. गेल्या दोन दिवसांपासून अमर हा बाहेरगावी गेलेला होता. शनिवारी सकाळी तो छत्रपती संभाजी नगर येथे शालकाकडे गेला होता. त्यानंतर सायंकाळी तो जळगावाला परतला मात्र घरी गेलेला नव्हता. शनिवारी रात्रीच्या सुमारास अमर हा दारुच्या नशेत तो खंडेराव नगराजवळील उड्डाणपुलावर गेलामोकळ्या जागेत दोन तरुण सिगरेट पित बसलेले होते. दारुच्या नशेत असलेल्या अमरने त्यांच्याकडे बघत शिवीगाळ केली. त्या दोघांपैकी एकाने अमरला दगड मारुन फेकला.
ट्रॅकमॅनच्या लक्षात आली घटना
सकाळी पावणेसहा वाजेच्या सुमारास ट्रॅकमॅन हे रेल्वे रुळावरुन जात असतांना त्यांना खंडेराव नगर पुलावरील दोन रेल्वे रुळांच्या मध्ये मयतावस्थेत दिसून आला. त्यांनी घटनेची माहिती रामानंद नगर पोलिसांना दिली. त्यानुसार पोलीस घटनास्थळील दाखल झाले. सुरुवातीला रेल्वेची धडक लागून अमर सपकाळे यांचा मृत्यू झाल्याचा अंदाज वर्तवला जात होता.
डोक्यात दगड घालीत केला खून दगड मारल्यामुळे अमर हा आणखीनच चिडला आणि त्याने पुन्हा दोघांना शिवीगाळ करण्यास सुरुवात केली. यावेळी संतापलेल्या दोघांनी अमरच्या डोक्यात सात ते आठ वेळा दगड टाकून त्याचा निघृण खून केला. त्यानंतर मृतदेह रेल्वे रुळावर टाकून देत दोघ तेथून पसार झाले.
मंदिरात जाणाऱ्या तरुणाने पटवली ओळख अमर सपकाळे यांच्या घराशेजारी राहणारा प्रमोद गोसावी हा मंदिरात जात असतांना त्याला रेल्वे रुळावर नागरिकांची गर्दी जमलेली दिसली. तो त्याठिकाणी गेला असता, त्याला मयत हा अमर सपकाळे असल्याचे दिसले. त्याने घटनेची माहिती अमर सपकाळेच्या कुटुंबियांना दिल्यानंतर त्याची ओळख पटली.
डीवायएसपींकडून दोघांची कसून चौकशी ताब्यात घेतलेल्या दोघांची कसून चौकशी केल्यानंतर त्यांनी अमर सपकाळे हा अश्लिल शिवीगाळ करीत असल्यामुळे संतापाच्या भरात त्याच्या डोक्यात दगड टाकून खून केल्याची कबुली त्यांनी दिली. यातील अल्पवयीन मुलगा हा पोलिसांच्या रेकॉर्डवरील असून त्याच्याविरुद्ध यापुर्वी जीवेठार मारण्याचा प्रयत्न, चोरी असे गंभीर गुन्ह्यांची नोंद आहे. उपविभागीय पोलीस अधिकारी नितीन गणापुरे यांनी देखील दोघ संशयितांची कसून चौकशी केली असून ते सकाळपासून रामानंद नगर पोलीस ठाण्यात ठाण मांडून बसलेले होते.
