जळगाव (प्रतिनिधी) – बहिणीसोबत असलेल्या प्रेमसंबंधातून दुचाकीवरुन आलेल्या दोघांनी रईस शेख नूर मोहम्मद (वय २८, रा. पिंप्राळा हुडको) या तरुणावर चॉपरने वार करीत प्राणघातक हल्ला केला. त्यानंतर याच वादातून चौघांनी संजय श्रावण शेजवळ (वय ५५, रा. पिंप्राळा हुडको) यांच्या घरात अनधिकृतपणे प्रवेश करुन साहीत्याची तोडफोड केली. ही घटना दि. २४ ऑगस्ट रोजी दुपारच्या सुमारास पिंप्राळा हुडको परिसरात घडली. याप्रकरणी परस्परविरोधात गुन्हा दाखल करण्यात आला असून दोन जणांना अटक करण्यात आली आहे.
भंगार विक्री करणारा रईस शेख नूर मोहम्मद हा दि. २४ रोजी घराजवळ बकऱ्यांना चारा टाकून संविधान चौकात गेला होता. त्यावेळी सुमीत शेजवळ हा अन्य एका जणासोबत दुचाकीवरुन त्याठिकाणी आला. त्याने माझ्या बहिणीसोबत प्रेमसंबंध का केले असे म्हणत कमरेला खोचलेला चॉपर काढून आज तुला मारुनच टाकतो म्हणत त्याच्या मानेवर वार केले. परंतू रईस याने वार चुकविल्यामुळे तो चॉपर कानावर लागला. दरम्यान, शेजवळ सोबत असलेल्या इसमाने देखील त्याच्याजवळील चॉपरने रईसच्या डोक्यात वार करुन त्याला गंभीर जखमी केले. त्यानंतर दोघ जण दुचाकी सोडून तेथून पसार झाले.
दोघांविरुद्ध जीवेठार मारल्याप्रकरणी गुन्हा गंभीर जखमी झालेल्या रईस शेख हा रक्तबंबाळ अवस्थेत पोलीस ठाण्यात गेला. मात्र पोलिसांनी त्याला मेडीकल मेमो देत रुग्णालयात उपचारासाठी दाखल केले. उपचार सुरु असतांना रईस शेख याने दिलेल्या फिर्यादीवरुन संशयित सुमित संजू शेजवळ याच्यासह अन्य एका विरुद्ध प्राणघातक हल्ला केल्याप्रकरणी गुन्हा दाखल करण्यात आला आहे.
तपासचक्रे फिरवित दोघांना केली अटक
गुन्हा दाखल होताच रामानंद नगर पोलीस ठाण्याचे उपनिरीक्षक सचिन रणशेवरे यांनी तपासचक्रे फिरवित सुमित संजय शेजवळ (रा. पिंप्राळा हुडको) व शुभम तुळशीराम राठोड (रा. रामेश्वर कॉलनी) या दोघांना अटक केली.
