जळगाव (प्रतिनिधी) – कार मागे घेत असताना मागे उभे असलेल्यांनी ‘कारचा आम्हाला धक्का लागेल’, असे सांगितल्याच्या रागातून कारचालकाने विक्की सुभाष तानसर (वय २६) यांच्यावर तीक्ष्ण हत्याराने वार केले. ही घटना दि. १२ जुलै रोजी रात्री ११ वाजता बेंद्रे चौकात घडली. या प्रकरणी दि. १३ जुलै रोजी रात्री एमआयडीसी पोलिस ठाण्यात चार जणांविरुद्ध गुन्हा दाखल करण्यात आला आहे. शहरातील सिद्धार्थ हॉस्पिटल परिसरात राहणारे विक्की तानसरे व त्यांचा मामे भाऊ नितीन नन्नवरे हे उभे असताना तेथे अनिल धारसिंग नाईक हा कार घेऊन आला होता. कार मागे घेवून जात असतांना त्यावेळी विक्की यांनी आम्ही मागे उभे आहे, आम्हाला धक्का लागेल, असे चालकाला सांगितले. त्याचा राग आल्याने नाईक याने तीक्ष्ण हत्याराने नाईक यांच्या खांद्यावर, पाठीवर वार करून दुखापत केली. तसेच चालकासोबत असलेल्या तीन जणांनी विक्की व त्यांच्या मामे भावाला मारहाण करून जिवे ठार मारण्याची धमकी दिली. या प्रकरणी विक्की तानसर यांनी एमआयडीसी पोलिस ठाण्यात फिर्याद दिली. त्यावरून चार जणांविरुद्ध गुन्हा दाखल करण्यात आला आहे.
