जळगाव (प्रतिनिधी) सराईत गुन्हेगाराने चाकूचा धाक दाखवित भरदिवसा एका पत्रकाराला लुटल्याची घटना शहरातील कंवरनगर परिसरात घडली. भरदिवसा लुटमार झाल्यामुळे प्रचंड खळबळ उडाली असून नागरिकांमध्ये भीतीचे वातावरण पसरले आहे.
या संदर्भात अधिक असे की, पत्रकार संतोष दिगंबर ढिवरे हे शनिवारी दुपारी ४ वाजेच्या सुमारास बी. जे. मार्केट परिसरातून आपले काम आटोपून घरी जात होते. दरम्यान, त्यांना मेहरुण परिसरातील स्वामी समर्थ केंद्राजवळ त्यांचा भाचा सिद्धांत बाविस्कर भेटला. दोघं जण गप्पा मारत उभे असतांना नागसेन नगरातील रितेश शिंदे उर्फ चिच्या हा अचानक त्यांच्या दुचाकीवर येवून बसला आणि तू पत्रकार आहे. तू भरपुर पैसे कमवतो. मला आत्ताच्या आता ५० हजार रुपये दे नाही तर तुला जीवे ठार मारेल, अशी धमकी देत संतोष यांच्या खिशातील मोबाईल, ५ हजार रुपयांची चांदीची चैन, ३ हजार ७०० रुपये रोख असा मुद्देमाल काढून घेतला. दरम्यान, रितेश शिंदे उर्फ चिच्या हा सराईत गुन्हेगार आहे. चिच्या हा मोबाईल हिसकवित असतांना त्याला संतोष यांनी विरोध केला होता. परंतू त्याने आपल्या खिशातून चाकू काढीत खुपसून देण्याची धमकी दिली. तसेच संतोष ढिवरे यांना जबरदस्ती मोटारसायकलसह कंवरनगरकडे घेऊन गेला. त्यानंतर तो र्ईच्छादेवी चौकाकडे पळून गेला. याप्रकरणी संतोष ढिवरे यांच्या फिर्यादिवरुन एमआयडीसी पोलिस ठाण्यात राकेश शिंदे उर्फ चिन्याविरुद्ध गुन्हा दाखल करण्यात आला आहे. दरम्यान, या घटनेमुळे शहरात खळबळ उडाली असून नागरिकांमध्ये भीतीचे वातावरण पसरले आहे.
