जळगाव (प्रतिनिधी) राष्ट्रवादी काँग्रेस पक्षाच्या बैठकीनंतर एकनाथराव खडसे यांना राष्ट्रवादीच्या प्रवेशाबाबत विचारले असता ज्यांनी ही चर्चा सुरू केली त्यांनाच तुम्ही विचारा, अशी प्रतिक्रिया दिली आहे.
राष्ट्रवादी काँग्रेसची मुंबईत आज महत्वाची बैठक झाली. या बैठकीत भाजपचे नेते माजी मंत्री एकनाथराव खडसे यांच्या पक्ष प्रवेशाबाबत निर्णय होण्याच्या चर्चे सुरु झाली होती. कारण खडसे यांनी थेट माजी मुख्यमंत्री देवेंद्र फडणवीस यांचे नाव घेऊन आरोप करायला सुरुवात केल्यानंतर खडसे यांच्या पक्षांतराची चर्चा होती. दरम्यान, ‘द क्लिअर न्यूज’ने माजी पालकमंत्री गुलाबराव देवकर यांच्याशी संपर्क साधला असता, त्यांनी सांगितले की, या बैठकीला आजी माजी आमदार उपस्थित आहेत. जिल्ह्यातील रखडलेल्या सिंचन प्रकल्पांवर चर्चा झाली. येथे कोणत्याही राजकीय विषयावर चर्चा झालेली नाही. तसेच खडसे यांच्या प्रवेशाचा विषय निघाला नाही. तर अमळनेर विधानसभा मतदार संघाचे आमदार अनिल भाईदास पाटील यांनी देखील बैठकीत रखडलेल्या सिंचन प्रकल्पांवर चर्चा सुरु असल्याचेच सांगितले. दुसरीकडे राष्ट्रवादीचे प्रदेशाध्यक्ष जयंत पाटील यांनी देखील बैठकीत याबाबत कोणतीही चर्चा झाली नसल्याचे स्पष्ट केले होते. तर आता खुद्द एकनाथराव खडसे यांनी ज्यांनी ही चर्चा सुरू केली त्यांनाच तुम्ही विचारा, अशी प्रतिक्रिया माध्यमांशी बोलतांना दिली आहे.
