जळगाव (प्रतिनिधी) निमखेडी शिवारातील मुख्य रस्त्यावर सूर्योदय आणि सूर्यास्तानंतर मोठ्या प्रमाणात नागरिक फिरत असतात. परंतु या भागात स्ट्रीट लाईट नसल्यामुळे नागरिकांचे हाल होत. तसेच काही टवाळखोर उपद्रव करायचे. याबाबत राष्ट्रवादीचे जिल्हा सचिव अॅड.कुणाल पवार यांनी तक्रारी अर्ज केला होता. त्यांच्या अर्जाची दखल घेत तालुका पोलीस स्थानकाने परिसरात गस्त वाढविले असून स्ट्रीट लाईट लावण्यासंदर्भात महापालिकेला स्मरणपत्र दिले आहे.
राष्ट्रवादी काँग्रेसचे जिल्हा सचिव अॅड. कुणाल पवार यांनी निमखेडी शिवारात स्ट्रीट लाईट अभावी नागरिकांचे हाल होत असून सूर्योदयापूर्वी आणि सूर्यास्तानंतर या भागात काही टवाळखोर उपद्रव करत असतात,त्यांचा बंदोबस्त करण्याची मागणी केली होती. त्यांच्या या तक्रारी अर्जावर आज तालुका पोलीस स्थानकात अॅड. पवार यांचा सविस्तर जबाब घेण्यात आला. तसेच परिसरात गस्त वाढवणार असल्याचे आश्वासन तालुका पोलिसांनी अॅड.पवार यांना दिले आहे. एवढेच नव्हे तर महापालिका आयुक्तांना यासंदर्भात पोलिसांनी पत्र देखील पाठविले आहे.
