नवी दिल्ली (वृत्तसंस्था) महाराष्ट्राच्या कोरेगाव भीमामध्ये २०१८ साली झालेल्या हिंसाचार प्रकरणात राष्ट्रीय तपास संस्थेने (NIA) ८३ वर्षीय फादर स्टॅन स्वामी यांना झारखंडमधून अटक केली आहे. दरम्यान, त्यांना आज (शुक्रवारी) एनआयए न्यायालयासमोर हजर केले जाण्याची शक्यता आहे.
गुरुवारी रात्री उशिरा कोरेगाव भीमा प्रकरणाची चौकशी करणाऱ्या एनआयएच्या टीमने फादर स्टेन स्वामी यांना नामकुम स्टेशन हद्दीत येणाऱ्या बगईंचा स्थित त्यांच्या निवासस्थानातून ताब्यात घेतले. जवळपास २० मिनिटे चौकशी केल्यानंतर स्वामी यांना अटक केली. विशेष म्हणजे, स्वामींच्या अटकेची माहिती एनआयएकडून झारखंड पोलिसांनाही देण्यात आलेली नव्हती. स्वामींची या अगोदर २७-३० जुलै आणि ६ ऑगस्टलाही एनआयएकडून चौकशी करण्यात आली होती. माओवाद्यांशी संबंध असल्याच्या आरोपावरून त्यांच्या चौकशीनंतर आपल्यावरचे सगळे आरोप स्वामी यांनी फेटाळले होते. दरम्यान, १ जानेवारी २०१८ रोजी पुण्याच्या कोरेगाव भीमा गावात दलित आणि मराठा समाजामध्ये हिंसाचार उफाळला होता.
