चाळीसगाव ( प्रतिनिधी ): शहरातील शास्त्रीनगर परिसरात बंद घराचे कुलूप तोडून अज्ञात चोरट्यांनी सोन्याचे दागिने व रोख रक्कम चोरून नेल्याची घटना उघडकीस आली आहे.
याबाबत शास्त्री नगरमधील संजय गेंदालाल सपकाळे (वय ३२) यांनी दिलेल्या फिर्यादीवरुन चाळीसगाव शहर पोलीस ठाण्यात गुन्हा दाखल करण्यात आला आहे. दरम्यान, संजय सपकाळे हे मजुरीचे काम करत असून विटभट्टीवर कामानिमित्त ते कुटुंबासह बाहेरगावी राहतात. त्यामुळष त्यांचे घर मागील २ महिन्यांपासून बंद होते. अधूनमधून ते घरी येत असत. दरम्यान, १४ फेब्रुवारीला त्यांच्या चुलत भावाने फोन करून घराचे कुलूप तुटल्याची माहिती दिली. त्यानंतर सपकाळे तत्काळ घरी आले. या वेळी दरवाज्याचे कुलूप तुटलेले व दरवाजा उघडा असल्याचे आढळले. घरात पाहणी केली असता कपाटातील कपडे व साड्या अस्ताव्यस्त पडलेल्या होत्या. मधल्या खोलीतील बाजरीच्या टाकीत ठेवलेला स्टीलचा डबा गायब असल्याचे निदर्शनास आले. त्या डब्यात प्रत्येकी ५ ग्रॅमच्या दोन सोन्याच्या अंगठ्या, ५ ग्रॅमचे सोन्याचे टोंगल तसेच सुमारे ५० हजार रुपये रोख रक्कम होती. अज्ञात व्यक्तीने हे सर्व साहित्य चोरून नेल्याची तक्रारीत म्हटले आहे. दरम्यन, याच भागातील डॉ. विनोद रघुनाथ अमृतकर यांच्या घरातही यापूर्वी चोरी झाल्याची माहिती समोर आली आहे. या प्रकरणातही अज्ञात चोरट्यांविरुद्ध गुन्हा दाखल आहे. पोलिसांनी घटनास्थळी पाहणी करून तपास सुरू केला आहे. तर परिसरात वाढत्या घरफोड्यांमुळे नागरिकांमध्ये भीती वाढली आहे.
