जळगाव (प्रतिनिधी) येथील जळगाव-औरंगाबाद रोडवरील कुसुंबा जकात नाक्याजवळ १३ सप्टेंबर रोजी दोन गटात तुंबळ हाणामारी झाली होती. या गँगवार मधील आणखी एका आरोपीला पोलीसांनी अटक केली आहे. राकेश भीमराव सपकाळे (वय २० वर्ष. नागसेननगर, रामेश्वर कॉलनी), असे अटक केलेल्या आरोपीचे नाव आहे.
राकेश भीमराव सपकाळे याला पोलीस कॉन्स्टेबल मुकेश पाटील यांना मिळालेल्या माहितीनुसार नागसेन नगर रामेश्वर कॉलनी येथून रात्री ताब्यात घेण्यात आले होते. सदरची कारवाई पोलिस निरीक्षक विनायक लोकरे यांच्या मार्गदर्शनाखाली पोलिस उपनिरीक्षक विशाल सोनवणे, अतुल वंजारी, आनंदसिंग पाटील, रामकृष्ण पाटील, मुकेश पाटील, विजय बावस्कर, हेमंत कळस्कर, चंद्रकांत पाटील यांनी केली. आरोपी आज आज न्यायालयात हजर केले असता त्याची दिनांक 30 पावेतो पोलिस कस्टडी रिमांड मिळालेली आहे. यापूर्वी सोनू उर्फ कुलदिप पोपट आढळे (वय-२८) रा. समता नगर, मुकेश उर्फ पप्पू रमेश शिरसाठ (वय-२२) रा. हुडको पिंप्राळा, अजय देवीदास सपकाळे (वय-२१) रा. बुध्दविहार हुडको पिंप्राळा आणि राकेश अशोक सपकाळे (वय-२२) रा. समता नगर अशी चार जणांना अटक करण्यात आली होती.
अशी झाली होती हाणामारी
निकेश राजपूत याच्या अंत्ययात्रेला आलेल्या देान गुन्हेगारी टोळ्यांमध्ये पूर्ववैमनस्यातून वाद उफाळून आला. अंत्यविधीत एकमेकांकडे बघण्यावरून देान्ही टोळ्यांमध्ये लोखंडी रॉड, चॉपर, चाकू लाठ्या-काठ्यांसह तुंबळ हाणामारी झाली होती. जखमी विशाल अहिरे याने दिलेल्या फिर्यादीनुसार विशाल, किरण गव्हाणे, आशू मोरे, विशाल पाटील, दीपक तरटे हे अंत्ययात्रेतून परतत असताना मागून स्विफ्ट कारमधून आलेल्या किरण खर्चे, आकाश परदेशी याच्यासह काही तरुणांनी चॉपरने विशालवर वार केले. या फिर्यादीवरून किरण खर्चे, आकाश परदेशी, छोटा किरण याच्यासह दोन जणांविरुद्ध गुन्हा दाखल करण्यात आला होता.
तर दुसऱ्या फिर्यादीत जखमी किरण खर्चे याने दिलेल्या जबाबनुसार, अंत्ययात्रेतून घरी परतत असताना विशाल अहिरे, किरण गव्हाणे, गौरव सपकाळे, दीपक तरटे, राकेश सपकाळे याच्यासह दोन जणांनी किरणसह मित्रांवर हल्ला चढविला. याचवेळी विशाल अहिरे याने किरणच्या डोक्यावर व कानावर चॉपरने वार करून त्याला गंभीर जखमी केले. यावेळी किरण चितळे याने किरण खर्चेला तात्काळ रिक्षात टाकून खासगी रुग्णालयात उपचारार्थ दाखल केले. याप्रकरणी विशाल अहिरे, किरण गव्हाणे, गौरव सपकाळे, दीपक तरटे, राकेश सपकाळे याच्यासह दोन जणांविरुद्ध गुन्हा दाखल करण्यात आला होता. त्यावेळी सहाय्यक निरीक्षक संदिप हजारे, सहाय्यक फौजदार अतुल वंजारी, रामकृष्ण पाटील, गोविंदा पाटिल यांच्या पथकाने या प्रकरणी आशू सुरेश मोरे (वय १९, रा. रामेश्वर कॉलनी), दीपक लक्ष्मण तरटे (वय २४), किरण शिवाजी गव्हाणे (वय २५), विशाल भगवान पाटील (वय २१) अशा चौघाना रात्री उशिरा ताब्यात घेतले होते.
