जळगाव (प्रतिनिधी) मागील काही दिवसांपासून वादाच्या भोवऱ्यात सापडलेल्या जळगाव तहसीलदार वैशाली हिंगे यांची नंदुरबार येथील सरदार प्रकल्पाच्या उप-सचिवपदी बदली झाली आहे. विशेष म्हणजे हिंगे यांच्या मुद्याला अनुसरुनच आज महसूल मंत्री बाळासाहेब थोरात यांची बदली संदर्भात जळगाव जागृत मंचने लाक्षणिक उपोषण केले होते.
या संदर्भात अधिक असे की, माहिती अधिकार कार्यकर्ते दीपक कुमार गुप्ता आणि जळगाव जागृत मंचचे शिवराम पाटील यांनी जळगाव तहसीलदार वैशाली हिंगे यांच्या संदर्भात महसूल मंत्री बाळासाहेब थोरात यांच्याकडे बऱ्याचदा तक्रार केली होती. परंतु याबाबत कुठलीही कारवाई होत नसल्यामुळे त्यांनी आज जळगाव जिल्हाधिकारी कार्यालयासमोर एक दिवसीय लाक्षणिक उपोषण केले होते. या लाक्षणिक उपोषणा दरम्यान त्यांनी बाळासाहेब थोरात यांच्यावर अनेक गंभीर आरोप लावले होते. परंतु याबाबत अचानक तडकाफडकी बदलीचा निर्णय घेण्यात आला आणि जळगाव तहसीलदार वैशाली हिंगे यांची नंदुरबार सरदार सरोवर प्रकल्पाच्या उपसचिवपदी तडकाफडकी बदली करण्यात आली आहे. याबाबत सौ.हिंगे यांच्यासोबत संपर्क साधण्याचा प्रयत्न केला असता तो होऊ शकला नाही.
