जळगाव (प्रतिनिधी) दूधसंघ निवडणुकीत मुक्ताईनगर तालुका मतदारसंघात उमेदवारी अर्ज दाखल करणाऱ्या आमदार मंगेश चव्हाण यांच्या विराेधात मंदाकिनी खडसे यांनी हरकत घेतली आहे. या हरकतीवर शुक्रवारी सायंकाळी सुनावणी झाली असून आज शनिवारी निर्णय दिला जाणार आहे. परंतू आ.मंगेश चव्हाण यांनी आपला उमेदवारी अर्ज कायम असल्याचा दावा केल्यामुळे एक मोठे राजकीय टशन निर्माण झाले आहे.
१० उमेदवारांनी १७ उमेदवारी अर्जावर हरकती
मुक्ताईनगरसह एकूण सात मतदारसंघात १० उमेदवारांनी १७ उमेदवारी अर्जावर हरकती घेतल्या आहेत. यात आमदार मंगेश चव्हाण, आमदार संजय सावकारे, जिल्हा बँकेचे संचालक संजय पवार यांचा समावेश आहे. मुक्ताईनगर तालुका मतदारसंघातील उमेदवार मंदाकिनी खडसे यांनी त्या मतदारसंघात उमेवारी अर्ज भरणाऱ्या आमदार मंगेश चव्हाण यांच्या अर्जावर हरकत घेतली. त्यांच्यासह उमेदवार रमेश पाटील आणि सुभाष पाटील यांच्याविराेधात देखील त्यांनी लेखी हरकत नाेंदविली. जळगाव तालुका मतदारसंघातील उमेदवार खेमचंद महाजन यांनी मुक्ताईनगर मतदारसंघात मंगेश चव्हाणांविराेधात हरकत नाेंदवली. दरम्यान, या हरकतींवर शुक्रवारी सुनावणी झाली असून निवडणूक निर्णय अधिकारी संताेष बिडवई यांच्याकडून निर्णय राखून ठेवण्यात आला आहे. तर आपला उमेदवारी अर्ज कायम असल्याचा दावा आमदार चव्हाण यांनी केला आहे. त्यामुळे मंदाकिनी खडसे यांचा अर्ज फेटाळला गेला का?, हे आज स्पष्ट होणार आहे.
संजय पवार यांनीही नोंदवली हरकत
जिल्हा बँकेचे संचालक संजय पवार यांनी धरणगाव तालुका मतदारसंघात उमेदवारी अर्ज भरणारे वाल्मिक पाटील आणि ओंकार मुंदडा यांच्या उमेदवारी अर्जावर हरकत घेतली तर ओंकार मुंदडा यांनी देखील संजय पवारांच्या उमेदवारी अर्जावर हरकत नाेंदवली. रावेर तालुका मतदारसंघात जगदीश बढे यांनी गिता चाैधरी, मिलींद वायकाेळे आणि सुभाष सराेदे या प्रतिस्पर्धी उमेदवारांच्या अर्जावर हरकत घेतली आहे.
इतर हरकतींवर निर्णय दिला जाणार साेमवारी
अनुसुचित जाती जमाती मतदारसंघात उदय अहिरे यांनी आमदार संजय सावकारे, श्रावण ब्रम्हे यांच्या अर्जावर हरकत घेतली. विमुक्त जाती- जमाती मतदारसंघात विजय रामदास पाटील यांनी अरविंद देशमुख यांच्या अर्जावर हरकत घेतली. भडगावमध्ये डाॅ.संजीव पाटील यांनी संदीपकुमार पाटील यांच्याविराेधात हरकत घेतली तर चाेपडा मतदारसंघात राेहित निकम यांनी इंदिराबाई पाटील आणि रवींद्र पाटील यांच्याविराेधात तर रवींद्र पाटील यांनी राेहित निकम यांच्या अर्जावर हरकत नाेंदवली. या हरकतींवर सुनावणी घेण्यात आली असून निर्णय साेमवारी दिला जाणार आहे. त्याकडे लक्ष लागले आहे.
सोमवारी अंतिम उमेदवारांची यादी होणार जाहीर
शुक्रवारी सर्व हरकतींवर सुनावणी प्रक्रिया पूर्ण झाली असून, सोमवारी वैध उमेदवार यादी प्रसिद्ध केली जाणार असल्याची माहिती निवडणूक निर्णय अधिकारी संतोष बिडवई यांनी दिली आहे. दरम्यान, सोमवारी अंतिम उमेदवारांची यादी जाहीर झाल्यानंतर २८ नोव्हेंबरपर्यंत माघार घेता येणार आहे.
