जळगाव (प्रतिनिधी) तालुक्यातील म्हसावद येथील शैक्षणिक संस्था ताब्यात घेण्यासाठी धर्मदाय आयुक्तांकडे बनावट फेरफार कागदपत्र सादर केल्याप्रकरणी २०१२ मध्ये दाखल गुन्ह्यात या गुन्ह्यातील संशयित आरोपी पालकमंत्री गुलाबराव पाटील यांचा खटल्याच्या कामकाजात गैरहजर राहण्याबाबत अर्ज काेर्टाने मंजूर केला आहे. दरम्यान, या खटल्याच्या सुनावणीला शुक्रवारी जिल्हा न्यायालयात सुरुवात झाली असून या गुन्ह्यात पालकमंत्रींसह सहा आराेपी आहेत.
म्हसावद शिक्षण प्रसारक मंडळ या संस्थेची धर्मदाय आयुक्तांकडे नोंदणी झालेली असून ती अद्याप सुरु झालेली नसताना ती ताब्यात घेण्यासाठी (टेकओव्हर) बनावट फेरफार कागदपत्र तयार करून सादर केल्याची तक्रार संस्थेचे तत्कालीन सचिव अर्जून लटकन पाटील यांनी ६ नाेव्हेंबर २०१२ राेजी पाेलिसात दाखल केली होती. या तक्रारीवरून गुलाबराव रघुनाथ पाटील, सुनील रघुनाथ पाटील, प्रताप गुलाबराव पाटील, सुगदचंद फकिरा पाटील, कैलास पाटील, रामसिंग पाटील आदी सहा जणांविरुद्ध गुन्हा दाखल करण्यात आला होता. या गुन्ह्या प्रकरणी पाेलिसांनी दाेषाराेप दाखल केल्यानंतर शुक्रवारी प्रथम वर्ग न्यायदंडाधिकारी जाेशी यांच्या काेर्टात पालकमंत्री गुलाबराव पाटील वगळता उर्वरित संशयित आराेपी हजर हाेते. काेर्टात शुक्रवारी फिर्यादी अर्जून पाटील यांची साक्ष, सरतपासणी व उलट तपासणी पूर्ण झाली. फिर्यादीतर्फे अॅड. गाेपाळ जळमकर यांनी काम पाहिले. तसेच सरकारी वकील अॅड. श्रीमती पाटील यांनी काम पाहिले.
