इस्लामाबाद (वृत्तसंस्था) पाकिस्तानच्या रावळपिंडी शहरात १०० वर्षाहून अधिक जु्न्या हिंदू मंदिरावर अज्ञात व्यक्तींनी हल्ला केला आहे. पाकिस्तानच्या इस्लामाबादमधील पुराना किला भागात शनिवारी संध्याकाळी साडेसात वाजता दहा ते पंधरा जणांच्या टोळीने मंदिरावर हल्ला केला. मुख्य गेट आणि वरच्या मजल्यावरील दुसर्या दरवाजाच्या पायऱ्या तोडल्या. तसेच मंदिराच्या नुतनीकरणाचे काम सुरू आहे.
या हल्ल्यात १० ते १५ जणांचा समावेश होता. हल्लेखोरांनी मुख्य दरवाजा आणि अन्य एका दरवाजासह जिनेदेखील तोडले. ‘डॉन’ने दिलेल्या वृत्तानुसार, इव्हॅक्यूए ट्रस्ट प्रॉपर्टी बोर्ड उत्तर विभाग सुरक्षा अधिकारी सय्यद रजा अब्बास जैदी यांनी रावळपिंडीतील बन्नी पोलिस ठाण्यात यासंदर्भात गुन्हा दाखल केलाय. गेल्या एक महिन्यापासून मंदिराचे बांधकाम आणि नूतनीकरणाचे काम सुरू होते असे तक्रारीत म्हटले आहे. मंदिरासमोर काही अतिक्रमणे होती. ते २४ मार्च रोजी हटविण्यात आले. मंदिरात धार्मिक विधी सुरु झाले नव्हते आणि पुजेसाठी कोणती मुर्ती देखील ठेवली नव्हती. सुरक्षा अधिकारी सय्यद रजा अब्बास जैदी यांनी मंदिराला नुकसान पोहोचवणाऱ्यांवर कायदेशीर कारवाई करण्याची मागणी केली आहे. यापूर्वी अतिक्रमण करणाऱ्यांनी मंदिराच्या भोवताली दुकाने बनवून ताबा मिळविला होता.
जिल्हा प्रशासनाने पोलिसांच्या मदतीने मंदिराजवळील सर्व प्रकारचे अतिक्रमण हटवले होते. मंदिराला अतिक्रमण मुक्त केल्यानंतर नुतनीकरणाचे काम सुरू करण्यात आले. या दरम्यान, मंदिराचे प्रशासक ओम प्रकाश यांनी या घटनेला दुजोरा देताना सांगितले की, मंदिरावर हल्ल्याची माहिती समजताच पोलीस घटनास्थळी दाखल झाले.
