धरणगाव (प्रतिनिधी) शहरातील छत्रपती शिवाजी महाराज शॉपिंग कॉम्प्लेक्स मधील एका व्यापाऱ्याची पावणे सात लाखांची रोकड असलेली पिशवी लांबवल्याची खळबळजनक घटना आज सकाळी घडली.
शहरातील छत्रपती शिवाजी महाराज व्यापारी संकुलात अनिल कुमार अँड हेमराज कंपनी नावाने किराणा दुकानासह होलसेलचे व्यापारी गुंजन डेडीया यांचे दुकान आहे. आज सकाळी साडेनऊ वाजेच्या सुमारास गुंजन डेडिया हे नेहमीप्रमाणे दुकान उघडण्यासाठी आले होते.
गुंजन डेडिया यांनी दुकानाचे बाजूचे शटर उघडून पैशांची पिशवी दुकानात ठेवली आणि समोरील शटर उघडण्यासाठी गेले. याच काळात दोन अज्ञात भामट्यांनी दुकानात घुसून रोकड असलेली पिशवी घेऊन दुचाकीवर पळ काढला. चोरटे सीसीटीव्हीत कैद झाले असून त्यांची ओळख पटविण्याचे काम सुरू आहे. दरम्यान स्थानिक गुन्हे शाखेचे एक पथक चोरट्यांच्या तपासात वेगवेगळ्या भागात गेले असल्याची माहिती वरिष्ठ पोलीस निरीक्षक किसनराव नजन पाटील यांनी दिली. धरणगाव सारख्या छोट्याशा शहरात भर दिवसा एवढी मोठी चोरी झाल्यामुळे व्यापाऱ्यांमध्ये भीतीचे वातावरण पसरले आहे.
दोघे चोरटे सकाळी साडेआठ वाजेपासूनच डेडीया यांच्यावर पाळत ठेवून होते. तसेच या भामट्यांना परिचित मधीलच कुणीतरी टीप दिली असल्याचा संशय देखील व्यक्त केला जात आहे. शेवटचे वृत्त हाती आले तेव्हा, धरणगाव पोलीस ठाण्यात गुन्हा दाखल करण्याचे काम सुरू होते.
