जळगाव (प्रतिनिधी) रिक्षाने बोहरा गल्लीतून घरी जात असताना एका महिलेचे ७५ दागिने भामट्यांनी लंपास केल्याची घटना गुरुवारी (१२ नोव्हेंबर) दुपारी घडलीय. मनिषा ज्ञानेश्वर शिंदे (४८, रा. मेहरूण) यांच्या पर्समधून दागिने लंपास झाले आहेत. सैय्यद हुसेन सैय्यद हसन (२८, रा. पिंप्राळा हुडको) असे अटक केलेल्या रिक्षाचालकाचे नाव आहे.
या संदर्भात अधिक असे की, मनिषा शिंदे या मेहरूण येथे कुटूंबिंयांसोबत वास्तव्यास आहेत. भाजीपाला खरेदी करण्यासाठी व दुरूस्तीसाठी टाकलेले सोन्याचे दागिने घेण्यासाठी गुरूवारी दुपारी तीन वाजेच्या सुमारास त्या सुभाष चौकात आल्या होत्या. भाजीपाला खरेदी केल्यानंतर त्यांनी दुरूस्तीसाठी टाकलेले दागिने दुकानातून घेतले. त्यानंतर घरी परतण्यासाठी त्या दुपारी ४ वाजेच्या सुमारास बोहरा गल्लीजजवळून बिलाल चौकात जाण्यासाठी रिक्षात बसल्या. दरम्यान, आधीच रिक्षामध्ये दोन महिला प्रवासी होत्या. त्यातील एक महिला खाली उतरली व तिने मनिषा यांना मधल्या बाजुस बसण्यास सांगितले. त्यानंतर राधाकृष्ण मंगल कार्यालयाजवळ चालकाने रिक्षा थांबविली व मनिषा शिंदे यांना खाली उतरवत मी या दोन महिलांना सोडून येतो. तुम्ही इथेच थांबा सांगून चालकाने भाडे न घेता निघून गेला. बराच वेळ होवूनही रिक्षा येत नसल्यामुळे अखेर मनिषा यांनी दुसऱ्या रिक्षाने घरी पोहोचल्या. मनिषा शिंदे घरी पोहोचल्यावर त्यांना पर्समधील २८ हजार ८०० रूपये किंमतीचे सोन्याचे काप व ४३ हजार २०० रूपये किंमतीचे सोन्याचे कामाचे झुमके चोरीस गेल्याचे लक्षात आले. त्यानुसार मनिषा शिंदे यांच्या फिर्यादीरून अज्ञात चोरट्यांविरूध्द शनिपेठ पोलिस ठाण्यात गुन्हा दाखल करण्यात आला आहे. दरम्यान, पोलिसांनी रस्त्यांवरील सीसीटीव्ही फुटेज तपासले असता त्यामध्ये रिक्षाचा क्रमांक मिळून आला. त्यानुसार रिक्षाचालक हुसेन याला अटक करण्यात आली आहे.
