चाळीसगाव (प्रतिनिधी) चाळीसगाव तालुक्यातील शेतकऱ्यांच्या दृष्टीने अत्यावश्यक असणाऱ्या भव्य व अत्याधुनिक सोयीसुविधा युक्त कृषी भवन बांधकामासाठी ११ कोटी ६९ लाखांचा निधी त्यांनी मंजूर करून आणला आहे. नुकताच याबाबत शासन निर्णय प्रकाशित झाला आहे. त्यामुळे चाळीसगाव तालुक्यातील तालुका कृषी अधिकारी, ४ मंडळ कृषी अधिकारी व तालुका बीजगुणन केंद्र यांचे कार्यालय एका छताखाली येतील.
सदर कृषी भवन मंजूर केल्याबद्दल आमदार मंगेश चव्हाण यांनी मुख्यमंत्री एकनाथजी शिंदे, उपमुख्यमंत्री देवेंद्रजी फडणवीस, अजितदादा पवार, ग्रामविकास मंत्री गिरीषभाऊ महाजन, कृषी मंत्री धनंजय मुंडे यांचे आभार मानले आहेत. आमदार मंगेशचव्हाण यांनी गेल्या काही दिवसांपासून आपल्या विकासकामांचा झंझावात सुरूच ठेवला असून अनेक आवश्यक असणारी विकासकामे मंजूर करून आणत आपली वेगळी ओळख निर्माण केली आहे.
कृषी भवन हे चाळीसगाव तालुक्यातील शेतकऱ्यांच्या प्रगतीचे केंद्र ठरणार – आमदार मंगेश चव्हाण यांना विश्वास
चाळीसगाव तालुक्यातील कृषि विभागाची कार्यालये विखुरलेली होती. तालुका स्तरावरील सर्व कार्यालये एकाच ठिकाणी सुसज्ज इमारतीमध्ये असणे, कामकाजाच्या दृष्टीने आवश्यक होते. कृषि विभागाचा लोकसंपर्क लक्षात घेता, विविध विभाग विखुरले गेल्याने प्रशासकीयदृष्ट्या व शेतकऱ्यांच्या दृष्टीने ते सोईचे नव्हते. शिवाय कार्यरत असलेल्या कार्यालयांसाठी मोठया प्रमाणावर परीरक्षणापोटी निधी दयावा लागत असल्याने खर्चही वाढत जातो. कृषि विभागामार्फत शेतकऱ्यांसाठी वेगवेगळे उपक्रम राबविण्यात येत असल्याने, एकाच छताखाली अद्ययावत कृषिसंकुल बांधणे आवश्यक होते. त्यामुळे चाळीसगाव येथे मंजूर कृषी भवन निश्चितपणे शेतकऱ्यांसाठी व प्रशासकीय दृष्टीने फायदेशीर ठरेल. तसेच ते आगामी काळात शेतकऱ्यांच्या प्रगतीचे केंद्र ठरेल असा विश्वास चाळीसगाव मतदारसंघाचे आमदार मंगेश चव्हाण यांनी यानिमित्ताने व्यक्त केला.
