नवी दिल्ली (वृत्तसंस्था) देशात कोरोनाग्रस्तांच्या रुग्णसंख्येत चढउतार पाहायला मिळत आहेत. गेल्या २४ तासांत देशात ११ हजार ४५१ नवीन कोरोनाबाधित रुग्णांची नोंद झाली. तर २६६ कोरोनाग्रस्तांना एका दिवसात प्राण गमवावे लागले असून कोरोनामुळे मृत्यू झालेल्यांची देशातील संख्या चार लाख ६१ हजार ०५७ इतकी झाली आहे.
केंद्रीय आरोग्य मंत्रालयानं दिलेल्या माहितीनुसार, देशात गेल्या २४ तासांत केवळ ११,४५१ नवीन रुग्णांची नोंद करण्यात आली आहे. त्याच वेळी, १३,२०४ लोकांनी कोरोनावर मात केली आहे. मात्र, यादरम्यान २६६ कोरोना रुग्णांचा मृत्यू झाला आहे. सध्या देशात सक्रिय रुग्णांची संख्या १,४२,८२६ आहे. तसेच कोरोनामुळे मृत्यू झालेल्यांची देशातील संख्या चार लाख ६१ हजार ०५७ इतकी झाली आहे. त्याच वेळी, पुनर्प्राप्ती दर ९८.२४ टक्के आहे, जो मार्च २०२० पासून सर्वाधिक आहे. सणासुदीच्या काळात कोरोनाचा प्रादुर्भाव वाढण्याची शक्यता तज्ज्ञ व्यक्त करत होते. पण सहा नोव्हेंबर रोजी संपलेल्या सणासुदीच्या आठवड्यानंतर देशभरातील केवळ १८ जिल्ह्यांमध्येच कोरोना पॉझिटिव्ही रेट १० टक्क्यांपेक्षा जास्त आहे. म्हणजेच देशाच्या मोठ्या भागात कोरोनाच्या रुग्णांमध्ये फारशी वाढ झालेली नाही.
आरोग्य मंत्रालयाने कोरोना संसर्गाच्या वेगानुसार जिल्ह्यांची तीन श्रेणींमध्ये विभागणी केली आहे. यामध्ये, पाच टक्क्यांपेक्षा जास्त सकारात्मकता दर, पाच ते १० टक्क्यांदरम्यान सकारात्मकता दर आणि १० टक्क्यांहून अधिक सकारात्मकता दर असलेले जिल्हे आहेत. तीन ऑक्टोबर रोजी १० टक्क्यांहून अधिक सकारात्मकता दर असलेल्या जिल्ह्यांची संख्या ३३ होती. २२ ऑक्टोबरपर्यंत ही संख्या २८ वर आली होती. आता फक्त १८ जिल्हे उरले आहेत. आतापर्यंत १० टक्क्यांहून अधिक सकारात्मकता दर असलेले जिल्हे १० राज्यांपर्यंत होते. आता फक्त केरळ, मिझोराम, अरुणाचल प्रदेश आणि नागालँड ही चार राज्ये आहेत. केरळमध्ये नऊ, मिझोराममध्ये सात आणि अरुणाचल प्रदेश आणि नागालँडमध्ये प्रत्येकी एक जिल्हे आहेत.
राज्यातील स्थिती
राज्याच्या आरोग्य मंत्रालयाने जारी केलेल्या ताज्या आकडेवारीनुसार, गेल्या २४ तासात ८९२ नव्या रुग्णांची नोंद झाली असून १६ कोरोनाबाधितांचा मृत्यू झाला आहे. गेल्या २४ तासात राज्यातील १,०६३ रुग्ण कोरोनामुक्त झाले आहेत. राज्यात सध्या १४,५२६ इतकी सक्रिय रुग्णसंख्या असून रुग्ण बरे होण्याचे प्रमाण हे ९७.६ टक्क्यांवर पोहोचले आहे. कोरोनामुळे होणाऱ्या मृत्यूमध्ये गेल्या काही दिवसांपासून सातत्याने घट होत असून राज्यातील मृत्यूदर २.१२ टक्के इतका झाला आहे. राज्यात सध्या १,४८,७४३ व्यक्ती होम क्वॉरंटाईनमध्ये आहेत तर ९६८ व्यक्ती संस्थात्मक क्वारंटाईनमध्ये आहेत. राज्यात आजपर्यंत ६,३२,४०,७६९ प्रयोगशाळा तपासण्या करण्यात आल्या आहेत.
