चाळीसगाव (प्रतिनिधी) तालुक्यातील वरखेडे-लोंढे प्रकल्पासाठी राज्य मंत्रीमंडळाने आज 1275 कोटी 78 लाख रुपयांच्या निधीला मान्यता दिली आहे. या माध्यमातून आमदार मंगेश चव्हाण यांनी पुन्हा एकदा आपल्या मतदारसंघातील मोठ्या प्रकल्पासाठी महत्त्वाचा निधी मिळवून दिला आहे.
निधीला मान्यता
वरखेडे-लोंढे प्रकल्पाचे काम पूर्ण झाले असून, आज मंत्रिमंडळाच्या बैठकीत या प्रकल्पाच्या उर्वरित कामांसाठी 1275 कोटी 78 लाख रुपयांच्या निधीला मंजूरी देण्यात आली आहे. जलसंपदा खात्याच्या माध्यमातून हा निर्णय घेण्यात आला आहे. यामध्ये मुख्यमंत्री देवेंद्र फडणवीस, जलसंपदा मंत्री ना. गिरीशभाऊ महाजन आणि आमदार मंगेश चव्हाण यांच्या प्रयत्नांचा महत्त्वपूर्ण वाटा आहे, ज्यामुळे हा निर्णय शक्य झाला आहे.
वरखडे-लोंढे असा आहे प्रकल्प
वरखेडे-लोंढे (बॅरेज) मध्यम प्रकल्प गिरणा नदीवर वरखेडे बु. या गावापासून एक किलोमीटर आणि चाळीसगावपासून 25 किलोमीटर अंतरावर स्थित आहे. या धरणासाठी धरण पाया व बुडीत क्षेत्रासाठी एकूण 787 हेक्टर जमीनीचे भूसंपादन करण्यात आले आहे, ज्यामध्ये खाजगी जमीन 289.56 हेक्टर, सरकारी जमीन 402.49 हेक्टर, आणि वनजमीन 94.95 हेक्टर आहे. धरणाचे एकूण पाणलोट क्षेत्र 5936.28 चौ.की.मी. आहे. या प्रकल्पाचा उपयुक्त जलसाठा 34.77 द.ल.घ.मी (1.23 टी.एम.सी.) आहे, तर मृतसाठा 0.82 द.ल.घ.मी (0.03 टी.एम.सी.) इतका आहे. वरखेडे धरण हे मातीचे आणि द्वारसहीत सांडवा प्रकारचे आहे, ज्याची एकूण लांबी 730 मीटर आहे. वरखेडे-लोंढे धरण पूर्ण झाल्यानंतर चाळीसगाव आणि भडगाव तालुक्यातील 8,290 हेक्टर क्षेत्र सुजलाम सुफलाम होईल, जे शेतकरी आणि स्थानिक समाजासाठी महत्त्वपूर्ण ठरेल.
