भुसावळ (प्रतिनिधी) जिल्ह्यात चोरटयांनी आता बसने प्रवास करणाऱ्या महिलांच्या पर्स लुटण्याकडे पुन्हा लक्ष्य केंद्रित केल्याचे दिसून येत आहे. भुसावळ बसस्थानक येथून खामगावचा प्रवास करणाऱ्या ही दोन महिलांच्या पर्समधून १ लाख ९२ हजार रूपये किंमतीचे ५ सोन्याचे दागिने व रोकड असा मुद्देमाल चोरून नेल्याची घटना ५ नोव्हेंबरला दुपारी १ वाजता समोर आली आहे. याप्रकरणी सोमवारी ६ नोव्हेंबर रोजी भुसावळ बाजार पेठ पोलीस ठाण्यात गुन्हा दाखल करण्यात आला आहे.
उत्तर प्रदेशातील आग्रा येथील मधूनगरमधील पूनम नितीन कुमार दुबे (वय ३२) महिला त्यांचे सहकारी सोनी आशिष मिश्रा यांच्यासोबत दि. ५ नोव्हेंबर रोजी भुसावळ बसस्थानकात आलेल्या होत्या. दुपारी १ वाजता त्यांना या खामगाव येथे जायचे असल्याने त्या भुसावळहून खामगाव असा प्रवास करत होत्या. या वेळी अज्ञात चोरटयांनी त्यांच्याजवळ असलेले सोन्याचे दागिने आणि रोख रक्कम असा एकुण १ लाख ९२ हजार रूपये किंमतीचा मुद्देमाल चोरून नेला. चोरीचा प्रकार घडल्यानंतर महिलेने दुसऱ्या दिवशी दि. ६ नोव्हेंबर रोजी सायंकाळी ७.३० वाजता भुसावळ बाजारपेठ पोलीस ठाण्यात धाव घेत तक्रार दिली. तपास पोहेकॉ महेश चौधरी करत आहेत.
