जळगाव (प्रतिनिधी) मोबाईल टॉवर लावलेल्या बॅटऱ्या चोरुन नेणाऱ्या चोरट्यांच्या एलसीबीच्या पथकाने पर्दाफाश केला. याप्रकरणी संशयित भिकन युवराज पाटील व धमेंद्र फकीरा पाटील (दोघ रा. मंगरुळ, ता. अमळनेर) यांना रविवारी १५ सप्टेंबर रोजी दुपारी ३ वाजता अमळनेर तालुक्यातील मंगरूळ येथून अटक करण्यात आली, एक जण फरार आहे. त्यांच्याकडून चोरलेल्या १२ बॅटऱ्यांसह चारचाकी मालवाहू वाहन जप्त करण्यात आले आहे.
जिल्ह्यात मोबाईल टॉवरची बॅटरी चोरुन नेल्याच्या घटना दिवसेंदिवस वाढत होत्या. या बॅटरी चोरणाऱ्यांचा शोध घेण्याच्या सूचना पोलीस अधीक्षक डॉ. महेश्वर रेड्डी यांनी एलसीबीच्या पथकाला दिल्या होत्या. त्यानुसार पोलीस निरीक्षक बबन आव्हाड यांनी पोलीस उपनिरीक्षक दत्तात्रय पोटे, पोहेकॉ संदीपक पाटील, प्रवीण मांंडोळे, गोरख बागुल, नंदलाल पाटील, भगवान पाटील, राहुल कोळी, राहुल बैसाणे, विलास गायकवाड, भारत पाटील यांचे पथक रविवारी १५ सप्टेंबर रोजी दुपारी तीन वाजता अमळनेर तालुक्यातील मंगरूळ येथील रवाना केले. या पथकाला अमळनेर तालुक्यातील मंगरुळ येथील भिकन पाटील हा बॅटरी चोरी करत असल्याची समजले. त्याची चौकशी केली असता, त्याने त्याचे दोन साथीदारांच्या मदतीने बॅटरी चोरी केल्याची कबुली दिली.
