मुंबई (वृत्तसंस्था) जळगावचे जिल्हा मध्यवर्ती बँकेचे चेअरमन गुलाबराव देवकरांचं नाव घेताच विरोधी पक्षनेते देवेंद्र फडणवीस यांच्यावर राष्ट्रवादीचे आमदार अनिल पाटील यांनी विधानसभेतच पलटवार केला आहे. गुलाबराव देवकर यांचे नाव विरोधी पक्षनेत्यांनी घेतलं. याचा मला खेद वाटतो. प्रविण दरेकर यांच्यावर सरकारने दाखल केलेला गुन्हा योग्यच असल्याचं अनिल पाटील म्हणाले.
विधान परिषदेतील विरोधी पक्षनेते प्रवीण दरेकर यांच्यावर मुंबईत फसवणुकीचा गुन्हा दाखल करण्यात आला आहे. त्याचे पडसाद मंगळवारी विधानसभेतही उमटले. विरोधी पक्षनेते देवेंद्र फडणवीस यांनी आक्रमक भूमिका घेत सरकारवर निशाणा साधला. महाराष्ट्रातील कुठलीही मजूर संस्था काढा, अर्धे आमदार आहेत. सगळ्या पक्षाचे आमदार मजूर संस्थेचे अध्यक्ष आहेत. सुडाच्या भावनेने विरोधी पक्षाचा आवाज दाबण्यासाठी गुन्हा दाखल करण्यात आला आहे. पण आम्ही घाबरणार नाही. न्यायालयात जावू. विरोधी पक्षनेत्यावर अशाप्रकराची कारवाई, आधी असं कधीच घडलं नव्हतं. आमचा आवाज बुलंद राहील, असं फडणवीस म्हणाले.
देवकर हे आजही जळगावमध्ये मजूर संस्थेचे अध्यक्ष – देवेंद्र फडणवीस
आजपासून आम्ही सरकारला प्रत्येक ठिकाणचे मजूर संस्थांचे अध्यक्ष कोण आहेत. त्याची यादी देऊ, असं सांगत फडणवीसांनी पहिलं नाव गुलाबराव देवकर यांचं घेतलं. देवकर हे आजही जळगावमध्ये मजूर संस्थेचे अध्यक्ष आहेत. ते राष्ट्रवादीचे नेते आहेत, असं फडणवीस यांनी सभागृहात सांगितलं. त्यानंतर गोंधळ सुरू झाल्याने पाच मिनिटांसाठी कामकाज तहकूब करण्यात आलं. कामकजा सुरू झाल्यानंतर राष्ट्रवादीचे आमदार अनिल पाटील यांनी फडणवीसांनी केलेला दावा खोडून काढला.
प्रविण दरेकर यांच्यावर दाखल केलेला गुन्हा योग्यच – अनिल पाटील
जळगावचे जिल्हा मध्यवर्ती बँकेचे चेअरमन गुलाबराव देवकर यांचे नाव विरोधी पक्षनेत्यांनी घेतलं. याचा मला खेद वाटतो. प्रविण दरेकर यांच्यावर सरकारने दाखल केलेला गुन्हा योग्यच आहे. कारण ते प्रत्यक्ष मजूर संस्थेचे मजूर सदस्य आहेत. देवकर हे कुठल्याही मजूर संस्थेचे सभासद नाहीत. पण दरेकर हे सभासद आहे, असं पाटील यांनी स्पष्ट केलं. ते असे मजूर आहेत ज्यांच्याकडे दोन-दोन कोटी रुपयांची गाडी आहे. पन्नास कोटी कोटींच्या बंगल्यात राहणारे मजूर आहेत. त्यांच्यावर सरकारने गुन्हा दाखल केलेला गुन्हा योग्य आहे. विरोधी पक्षनेत्यांनी केलेला उल्लेख खोटा आहे, असा पलटवार पाटील यांनी केला.
