कासोदा ता. एरंडोल (प्रतिनिधी) येथून जवळच असलेले फरकांडे येथील ३२ वर्षीय तरुणाने राहत्या घरात गळफास घेऊन आत्महत्या केल्याची घटना घडली आहे.
याबाबत अधिक असे की, मनोज भाऊराव पाटील उर्फ अण्णा पाटील (वय ३२ रा. फरकांडे) असे मृत तरुणाचे नाव आहे. नेहमीप्रमाणे जेवण झाल्यानंतर मी झोपतो असे सांगून मनोज घराच्या शेवटच्या खोलीत झोपायला गेला रात्री साडे अकराच्या वाजेच्या सुमारास मनोजच्या पत्नीस जाग आल्यावर मनोजने पाण्याच्या नळीने गळफास घेऊन लटकलेल्या अवस्थेत पाहून मनोजच्या पत्नीने आरडाओरडा केल्यावर घरातील लोक जागे झाले. झालेला प्रकार बघताच मनोजची आई जागेवर कोसळली. ही माहिती मिळताच गावातील पोलीस पाटील व शेजारी मंडळींनी घटनास्थळी धाव घेतली. व झालेला सर्व प्रकार पोलीस स्टेशनला सांगितला. कासोदा पोलीस स्टेशनचे सहायक फौजदार भागवत पाटील यांनी घटनास्थळी पंचनामा केला.
मनोजचे एकत्रित कुटुंब असल्याने मनूच्या कुटुंबावर सात लाख रुपये कर्ज होते. कर्जाच्या नैराश्यातून आत्महत्या केली असावी असा अंदाज आहे. मनोज हा परिवारातील मोठा मुलगा असून त्याच्यामागे आई-वडील, लहान भाऊ, पत्नी, दोन मुली असा परिवार आहे.
