मुंबई (वृत्तसंस्था) शिवसेनेचे बंडखोर नेते एकनाथ शिंदे आणि समर्थकांनी नवा गट स्थापन करण्याबाबत पाठिंबा असलेल्या आमदारांचं पत्र पाठवलं आहे. यावर विधानसभा उपाध्यक्ष नरहरी झिरवळ यांनी आपली भूमिका स्पष्ट केली. कायद्यात पक्षप्रमुखाने गटनेता निवडायचा असतो आणि गटनेत्याने प्रतोद निवडायचा असतो, असं झिरवळ म्हणाले. तसेच अपक्ष आमदारांची मतं गृहीत धरली जाणार नाही, असंही स्पष्ट केलं.
शिवसेनेचे वरिष्ठ नेते आणि नगरविकास मंत्री एकनाथ शिंदे यांच्या बंडाला वाढता प्रतिसाद मिळताना दिसत आहे. माझ्यासोबत ४६ आमदार आहेत आणि आणखी १० आमदार येतील, असा दावा शिंदेंनी काल गुवाहाटीच्या विमानतळाबाहेर केला. यानंतर आज सेनेचे सहा आमदार गुवाहाटीला गेले आणि शिंदेंच्या गटात सामील झाले. आपल्यासोबत सेनेचे दोन तृतीयांश आमदार असल्यानं गटनेतेपदी अजय चौधरी यांची नेमणूक बेकायदेशीर असल्याचा दावा शिंदेंनी केला. आता यावर विधानसभेचे उपाध्यक्ष नरहरी झिरवळ यांनी भाष्य केलं आहे.
एकनाथ शिंदेंनी गटनेतेपदावर दावा करणारं पत्र पाठवलं. मात्र त्यावरील सहीवर आमदार नितीश देशमुख यांनी आक्षेप घेतला आहे. मी इंग्रजीत सही करतो. मात्र पत्रावर माझ्या नावे करण्यात आलेली स्वाक्षरी मराठीत असल्याचा देशमुखांचा दावा आहे. त्यामुळे मला हे प्रकरण तपासावं लागेल, असं झिरवळ म्हणाले. बंड केल्यानंतर शिवसेनेनं एकनाथ शिंदेंना गटनेतेपदावरून हटवलं आणि अजय चौधरी यांची नियुक्ती केली. यावर शिंदेंनी आक्षेप घेतला. दोन तृतीयांश आमदारांचा पाठिंबा आमच्याकडे आहे. त्यांना चौधरी यांची नियुक्ती मान्य नाही. त्यामुळे चौधरी यांची नियुक्ती बेकायदेशीर असल्याचा दावा शिंदेंनी केला. शिंदे गटानं शिवसेनेचे विधिमंडळ मुख्य प्रतोद म्हणून भरत गोगावले यांची नियुक्ती केली आहे.
अपक्षांची मतं गृहीत धरली जाणार नाही
“विशिष्ट गट स्थापन करण्याचं जे पत्र माझ्याकडे आलं आहे त्यावर ३०-३२ आमदारांच्या सह्या आहेत त्यातही संशय आहे. आमदार नितीन देशमुख यांनी ते इंग्रजी स्वाक्षरी करतात आणि पत्रावर त्यांच्या नावासमोर मराठीत स्वाक्षरी आहे असं म्हटलं आहे. त्यामुळे त्यावर तपासणी करावी लागेल. त्यावर अपक्ष आमदारांच्या सह्या असतील तर त्यांना त्याबाबत अधिकार आहे का याचाही विचार करावा लागेल. शिवसेना पक्ष म्हणून अपक्षांची मतं त्यात गृहीत धरली जाणार नाही,”
कायद्यात पक्षप्रमुखाने गटनेता निवडायचा असतो
“कायद्यात पक्षप्रमुखाने गटनेता निवडायचा असतो आणि गटनेत्याने प्रतोद निवडायचा असतो. याप्रमाणे शिवसेना पक्षप्रमुख उद्धव ठाकरे यांनी आधी एकनाथ शिंदे यांना गटनेतेपदी निवडलं होतं, त्यानंतर एकनाथ शिंदे यांच्याऐवजी अजय चौधरी यांना गटनेतेपदी नियुक्तीचं पत्र दिलं,” अशी माहिती नरहरी झिरवळ यांनी दिली.
