रायगड : छत्रपती शिवाजी महाराजांविषयीची अपार श्रद्धा, दृढ इच्छाशक्ती आणि संकल्प पूर्ण करण्याची जिद्द यांचा प्रत्यय यंदाच्या रायगड मोहिमेत आला. शिवनेरी फाउंडेशनच्या अध्यक्षा तथा चाळीसगावच्या लोकनियुक्त नगराध्यक्षा सौ. प्रतिभाताई चव्हाण यांनी हजारो युवकांसोबत पायी रायगड चढत शिवरायांचे दर्शन घेत आपल्या संकल्पाची यशस्वी पूर्तता केली.
आमदार मंगेशदादा चव्हाण यांच्या संकल्पनेतून आयोजित करण्यात आलेल्या भव्य रायगड मोहिमेत प्रतिभाताई सुरुवातीपासूनच सहभागी झाल्या होत्या. यावेळी त्यांच्यासोबत चाळीसगांव नगरपरिषदेच्या सर्व महिला नगरसेविका उपस्थित होत्या. चाळीसगावहून रायगडकडे निघालेल्या हजारो विद्यार्थी आणि युवकांसोबत त्यांनी संपूर्ण प्रवास केला. प्रवासादरम्यान युवकांशी संवाद साधत, त्यांना प्रेरणा देत आणि त्यांच्या भावना जाणून घेत त्या या मोहिमेचा अविभाज्य भाग बनल्या.
रायगडाच्या पायथ्याशी असलेल्या हरवंडी आश्रम येथे सर्व विद्यार्थ्यांचा मुक्काम होता. विशेष म्हणजे, प्रतिभाताई यांनी देखील विद्यार्थ्यांसोबतच मुक्काम केला. रात्री आयोजित करण्यात आलेल्या सांस्कृतिक कार्यक्रमात युवकांचा उत्साह, शिवभक्ती आणि राष्ट्रप्रेमाचा आविष्कार पाहताना त्या देखील भावूक झाल्या. शिवचरित्रावर आधारित विविध सादरीकरणे, घोषणांनी दुमदुमलेले वातावरण आणि शिवरायांच्या विचारांवर झालेला संवाद यामुळे हरवंडी आश्रम परिसर शिवमय झाला होता.
मात्र या मोहिमेतील सर्वात प्रेरणादायी प्रसंग रायगड चढाईदरम्यान घडला. शिवराज्याभिषेक सोहळ्यानिमित्त रायगडावर जाऊन छत्रपती शिवाजी महाराजांचे दर्शन घ्यायचे, पण ते पायी चालत जाऊनच घ्यायचे असा संकल्प प्रतिभाताईंनी यापूर्वीच केला होता. रायगडावर जाण्यासाठी रोपवेची सुविधा उपलब्ध असतानाही त्यांनी त्या सुविधेचा वापर न करता विद्यार्थ्यांसोबत पायी चढाई करण्याचा निर्णय घेतला.
रायगडाची खडी चढण, अवघड पायवाट आणि दमछाक करणारा प्रवास असूनही त्यांनी जिद्द सोडली नाही. हजारो युवकांसोबत पाऊल न पाऊल टाकत त्यांनी संपूर्ण गड चढाई पूर्ण केली. अनेक ठिकाणी युवकांना प्रोत्साहित करत, त्यांचा उत्साह वाढवत त्या पुढे सरकत राहिल्या.
स्वतः नगराध्यक्षा कोणताही विशेष मान-सन्मान किंवा सुविधा न स्वीकारता आपल्या सोबतच पायी चालत आहेत, हे पाहून अनेक युवकांना नवी ऊर्जा मिळाली. थकवा जाणवत असतानाही अनेकांनी प्रतिभाताईंच्या जिद्दीतून प्रेरणा घेत गड चढाई पूर्ण केली.
अखेर दुर्गराज रायगडावर पोहोचून त्यांनी छत्रपती शिवाजी महाराजांच्या समाधीस्थळाचे दर्शन घेतले आणि आपला संकल्प पूर्ण केला. त्या क्षणी त्यांच्या चेहऱ्यावर दिसणारे समाधान हे त्यांच्या श्रद्धेचे आणि निष्ठेचे प्रतीक होते.
रायगडावर अनुभवलेले ऐतिहासिक वैभव, शिवराज्याभिषेक सोहळ्याचे साक्षीदार होण्याचा अभिमान आणि हजारो युवकांसोबत घालवलेले अविस्मरणीय क्षण हे या मोहिमेचे वैशिष्ट्य ठरले. शिवरायांप्रती असलेली श्रद्धा केवळ शब्दांत नव्हे, तर कृतीतून व्यक्त व्हावी याचे जिवंत उदाहरण प्रतिभाताई चव्हाण यांनी या मोहिमेतून दाखवून दिले.
त्यांची निष्ठा, त्यांचा संकल्प आणि रोपवेची सुविधा उपलब्ध असतानाही हजारो युवकांसोबत पायी रायगड चढण्याचा घेतलेला निर्णय हा सहभागी युवकांसाठी आयुष्यभर प्रेरणा देणारा ठरणार आहे. कारण खरे नेतृत्व हे आदेश देत नाही, तर स्वतः मार्गावर चालत इतरांना प्रेरणा देत असते आणि प्रतिभाताईंनी नेमके तेच करून दाखवले.
