जळगाव (प्रतिनिधी) – जळगाव कृषी उत्पन्न बाजार समितीच्या राजकारणात गेल्या काही दिवसांपासून सुरू असलेल्या अंतर्गत संघर्षाला अखेर मोठे वळण मिळाले आहे. सभापती सुनील महाजन यांनी अविश्वास प्रस्तावाला सामोरे जाण्यापूर्वीच आपल्या पदाचा राजीनामा उपनिबंधकांकडे सादर केला आहे. त्यामुळे बाजार समितीच्या राजकीय वर्तुळात मोठी खळबळ उडाली आहे.
गेल्या काही दिवसांपासून बाजार समितीतील संचालकांमध्ये नाराजी वाढत होती. त्यानंतर तब्बल १३ संचालकांनी दि. २७ एप्रिल रोजी जिल्हाधिकारी रोहन घुगे यांच्याकडे सभापती सुनिल महाजन यांच्या विरोधात अविश्वास प्रस्ताव दाखल केला होता.
सभापतींचे संचालक मंडळाशी वागणे बेजबाबदार व अकार्यक्षम असल्याचा आरोप करत संचालकांनी अविश्वासाची भूमिका घेतली होती. दरम्यान, अविश्वास प्रस्तावाची प्रक्रिया सुरू असतानाच सुनिल महाजन यांनी चाळीसगावचे आमदार मंगेश चव्हाण यांची भेट घेतल्याची चर्चा रंगली होती. त्यानंतर अखेर त्यांनी थेट उपनिबंधक कार्यालयात राजीनामा सुपूर्द केला.
महाजन यांच्या या निर्णयामुळे अविश्वास प्रस्तावाची नामुष्की टळली असली तरी बाजार समितीतील सत्तासमीकरणांना नव्याने कलाटणी मिळाली आहे. आता पुढील सभापती कोण होणार, याकडे राजकीय वर्तुळाचे लक्ष लागले आहे.
उपनिबंधकांकडून लवकरच निवड कार्यक्रम
सभापती पद रिक्त झाल्याने आता जिल्हा उपनिबंधकांकडून नव्या सभापती निवडीचा कार्यक्रम जाहीर केला जाणार आहे. आगामी आठवड्यात निवड प्रक्रिया पार पडण्याची शक्यता व्यक्त केली जात आहे.
विशेष म्हणजे, मागील निवडीत ऐनवेळी राजकीय समीकरणे जुळवत सुनिल महाजन यांनी सभापतीपदाची बाजी मारली होती. त्यामुळे इच्छुकांना संधी हुकली होती. यावेळी मात्र नव्या नेतृत्वाला संधी मिळणार का, याबाबत उत्सुकता वाढली आहे.
