जळगाव ( प्रतिनिधी ): जळगाव कृषी उत्पन्न बाजार समितीच्या राजकारणात पुन्हा एकदा मोठी खळबळ उडाली असून सभापती सुनिल महाजन यांच्या विरोधात १३ संचालकांनी अविश्वास प्रस्ताव दाखल केला आहे. आज (दि.२७) संचालकांनी जिल्हाधिकारी रोहन घुगे यांची भेट घेऊन स्वाक्षरीयुक्त निवेदन सादर केले.
सभापतींवर गंभीर आरोप अविश्वास प्रस्ताव सादर करताना संचालकांनी सभापतींवर अनेक गंभीर ठपके ठेवले आहेत.
सभापतींचे वर्तन बेजबाबदार व अकार्यक्षम असल्याचा आरोप करत त्यांनी—
आर्थिक नियोजनाचा अभाव
संचालक मंडळाला विश्वासात न घेता निर्णय
मनमानी कारभार
अशा मुद्द्यांवर तीव्र नाराजी व्यक्त केली आहे. तसेच त्यांना तात्काळ पदमुक्त करण्याची मागणीही करण्यात आली आहे.
१३ संचालकांच्या स्वाक्षऱ्या
या अविश्वास प्रस्तावावर लकी टेलर, पल्लवी देशमुख, शामकांत सोनवणे, मनोज चौधरी, योगराज सपकाळे, लक्ष्मण पाटील, जयराज चव्हाण, मिलींद चौधरी, संदीप पाटील, समाधान धनगर, अरूण पाटील, लिना महाजन, हेमलता पाटील, यमुनाबाई सपकाळे यांसह एकूण १३ संचालकांनी स्वाक्षऱ्या केल्या आहेत.
८ महिन्यांत पुन्हा सत्तानाट्य
विशेष म्हणजे, याच बाजार समितीत काही महिन्यांपूर्वी शामकांत सोनवणे यांच्या विरोधातही अविश्वास प्रस्ताव आणण्यात आला होता. मात्र त्या आधीच त्यांनी राजीनामा दिला होता. यानंतर सभापतीपदासाठी लकी टेलर यांचे नाव पुढे असताना नाट्यमय घडामोडीत २९ ऑगस्ट रोजी सुनिल महाजन यांनी अर्ज भरत राजकीय समीकरणे बदलली आणि सभापतीपद पटकावले.
पुढे काय?
आता अवघ्या ८ महिन्यांच्या कार्यकाळातच महाजनांविरोधात अविश्वास प्रस्ताव आल्याने बाजार समितीतील सत्तासंघर्ष पुन्हा ऐरणीवर आला आहे. हा प्रस्ताव पारित होणार की फसणार, याकडे संपूर्ण जिल्ह्याचे राजकीय लक्ष लागले आहे.
