जळगाव (प्रतिनिधी) भरधाव डंपरने पुढे चालणाऱ्या दुचाकीला जोरदार धडक दिल्याने या अपघातात आसिफ कुरेशी हाजी शौकत कुरेशी (वय ४० रा. आयेशा नगर, सुप्रीम कॉलनी) हे दुचाकीस्वार जागीच ठार झाले. ही घटना बुधवार दि.११ डिसेंबर रोजी दुपारी साडेतीन वाजेच्या सुमारास आरएल चौफुलीजवळील महामार्गावर घडली.
उत्तरप्रदेशमधील रहिवासी असलेले आसिफ कुरेशी हे रोजगारासाठी गेल्या अनेक वर्षांपासून सुप्रीम कॉलनी परिसरातील आयेशानगरात राहतात. वॉल पेपर लावण्याचे काम करणारे कुरेशी बुधवारी दुपारच्या सुमारास (एमएच १९, डीसी १७५१) क्रमांकाच्या दुचाकीने सुप्रिम कॉलनीतून शहराकडे येत होते. त्यावेळी आरएल चौफुलीजवळील महामार्गावर त्यांच्या मागून भरधाव वेगाने येणाऱ्या (एमएच १९ सीएक्स ४९४०) क्रमांकाच्या डंपरने त्यांना जोरदार धडक दिली. या अपघातात दुचाकीस्वार आसिफ कुरेशी यांचा जागेवरच मृत्यू झाला. घटनेची माहिती मिळताच एमआयडीसी पोलिस घटनास्थळी दाखल झाले. याप्रकरणी पोलिसात अकस्मात मृत्यूची नोंद करण्यात आली आहे. कुरेशी यांच्या पश्चात पत्नी, तीन मुले आणि एक मुलगा असा परिवार आहे.
भरधाव डंपरने दिलेले धडक इतकी जोरात होती की, अपघातग्रस्त दुचाकी ही थेट डंपरच्या पुढील चाकाखाली येवून तीचा चुराडा होवून त्यामध्ये अडकली होती. दरम्यान, पोलिसांनी डंपरसह दुचाकी पोलीस ठाण्यात जप्त केली आहे. अपघात झाल्यानंतर त्या ठिकाणाहून सुप्रिम कॉलनी परिसरातील काही तरुण जात होते. त्या वेळी त्यांना अपघातग्रस्त वाहने दिसल्यामुळे त्या दुचाकीवरून मयताची ओळख पटली. एका जणाने रिक्षामधून कुरेशी यांना शासकीय वैद्यकीय महाविद्यालय व रुग्णालयात दाखल केले. तेथे डॉक्टरांनी मयत घोषित केले.
