धरणगाव (प्रतिनिधी) बस स्थानक परिसरात हाणामारी करणाऱ्या करणाऱ्या चौघांविरुद्ध धरणगाव पोलिसांनी कारवाईचा बडगा उचलत स्वत : फिर्यादी देत गुन्हा दाखल केला आहे.
आपल्या गाडीतील प्रवासी दुसऱ्या गाडीत बसत असल्याच्या कारणामुळे प्रवाश्याला अश्लील शिवीगाळ करून मारहाण केल्याची घटना समोर आली आहे. याप्रकरणी पोना मिलींद अशोक भामरे यांनी दिलेल्या फिर्यादीवरून धरणगाव पोलिसात चौघांविरुद्ध गुन्हा दाखल करण्यात आला आहे. दि. ०८ फेब्रुवारी २०२५ रोजी सकाळी १०.३० वाजेच्या सुमारास बस स्टॅन्डसमोर सार्वजनिक ठिकाणी अतुल मधुकर वारडे (रा. धानोरा) याची आई व बादल आकाश शिरसाठ (रा. अशो सम्राट नगर उनदा ९ नंबर, सुरत) असे संदीप संजय कंखरे (रा. धरणगाव) यांच्या गाडीत बसले होते. मात्र, दुसरी गाडी निघत असल्याने अतुल वारडे याची आई व बादल शिरसाठ हे दोन्ही दुसऱ्या गाडीत बसले. त्यामुळे संदीप संजय कंखरे याने अतुल वारडे याच्या आईला अश्लील शिवीगाळ केली. दरम्यान, तेथे असलेले धरणगाव पोलीस स्टेशनचे पोना मिलींद अशोक भामरे हे संदीपला बोलण्यास गेले असता त्याने त्यांना देखील शिवीगाळ केली. त्यामुळे हातपाई होऊन संदीपला धक्का लागल्याने त्याचा तोल गेला आणि तो तोंडावर पडल्याने त्याचे दात तुटून तो जखमी झाला. यावेळी स्वप्नील उर्फ सोनु पाडुरंग धनगर (रा. धरणगाव) याने बादल शिरसाठ याला दगड मारून जखमी केले. याप्रकरणी धरणगाव पोलीस स्टेशनचे पोना मिलींद अशोक भामरे यांनी दिलेल्या फिर्यादीवरून धरणगाव पोलिसात चौघांविरुद्ध गुन्हा दाखल करण्यात आला आहे. तसेच पुढील तपास पो.हे.कॉ चंद्रकांत पाटील हे करीत आहेत. तसेच कायदा हातात घेणाऱ्या कुणाचीही गय केली जाणार नाही, असा सज्जड इशारा पोलीस निरीक्षक पवन देसले यांनी दिला आहे.
